Jarmošynu złavili na absurdnych ličbach hałasavańnia «suprać usich» na prezidenckich vybarach 2006 hoda?

Na vybarach 2006 hoda bolej za 230 tysiač biełarusaŭ prahałasavali «suprać usich», havoryć aficyjnaja statystyka. Heta kala 3,5% vybarcaŭ, što ŭziali ŭdzieł u hałasavańni. Čysta tearetyčna takaja ličba całkam moža być.

Prablema ŭ inšym: anamalnyja ličby «suprać usich» u dvuch rehijonach krainy, a mienavita pa Mahiloŭskaj i Homielskaj abłaściach.

Aficyjnyja dadzienyja. Ličba tych, chto prahałasavaŭ «suprać usich» pa abłaściach i Minsku

Dla paraŭnańnia, kali ŭ Viciebskaj vobłaści suprać usich prahałasavali amal 30 tysiač čałaviek, u Bresckaj — 51 tysiača, dyk u Mahiloŭskaj — tolki roŭnieńka 300 čałaviek! Situacyja zusim nievierahodnaja.

U šmat jakich rajonach Biełarusi kolkaść tych, chto addaŭ hołas «suprać usich», vyjšła kudy bolšaja, čym ličba pa ŭsioj Mahiloŭskaj vobłaści. Naprykład, u Buda-Kašaloŭskim rajonie Homielskaj vobłaści «suprać usich» prahałasavali 312 čałaviek. U Puchavickim rajonie Minskaj vobłaści takich było 1290 čałaviek, a ŭ Kobrynskim rajonie Bresckaj vobłaści — 5970.

A voś, dla paraŭnańnia, aficyjnyja dadzienyja što da hałasoŭ «suprać usich» pa 10 najvialikšych haradach Biełarusi:

Jak bačym, u Babrujsku Mahiloŭskaj vobłaści (7-y pa vieličyni horad krainy) «suprać usich» jak byccam zusim nichto nie prahałasavaŭ. A ŭ Mahilovie takich tolki 122 čałavieki, i ŭsie jany biez vyniatku žyvuć u Leninskaj vybarčaj akruzie, a pa Kastryčnickaj akruzie takich — znoŭ-taki nul! Situacyja z łahičnaha i matematyčnaha hledzišča zusim nievierahodnaja.

Z čaho b heta žychary haradoŭ Mahiloŭščyny, niepadobna da biełarusaŭ inšych rehijonaŭ krainy, metakiravana nie hałasavali «suprać usich», ani da razumieńnia.

Nijakich uciamnych tłumačeńniaŭ takoj źjavie niama. Aproč adnaho: usie hetyja ličby štučnyja.

I paćviardžaje heta statystyka hałasavańnia «suprać usich» pa rajonach krainy. Kali pahladzieć na aficyjnyja dadzienyja pa ŭsich rajonach, dyk bačym absurdnuju situacyju.

U Mahiloŭskaj vobłaści ŭ bolšaści rajonaŭ «suprać usich» jak byccam nie hałasavaŭ zusim nichto! Jašče try takija rajony ŭ Homielskaj vobłaści. Bolej za toje, u vynikovych ličbach pa Žłobinskim i Mazyrskim rajonach (u čyrvonym kolery) uvohule niemažlivaja situacyja. Tam ličba tych, chto prahałasavaŭ «suprać usich», vychodzić nižejšaj za nul!

Inačaj kažučy, kali skłaści ličby tych, chto prahałasavaŭ za kožnaha z kandydataŭ, i ličbu niadziejnych biuleteniaŭ pa Žłobinskim i Mazyrskim rajonach, tady ahulnaja suma vyjdzie bolšaj (na 151 i 45, adpaviedna) za ličbu ludziej, što prahałasavali. Vychodzić, kab ličby źbiehlisia, kolkaść tych, chto prahałasavaŭ «suprać usich», musić być minus 151 i minus 45 čałaviek. Jak takija vynikovyja ličby ŭvohule zaćvierdziła Centralnaja vybarčaja kamisija, nie zrazumieła.

Rajony, dzie na vybarach-2006 «suprać usich» jak byccam prahałasavała nul i mieniej čałaviek

Sprava ŭ tym, što ŭ vynikovych tablicach Centralnaha vybarčaha kamiteta za 2006 hod, u adroźnieńnie da paźniejšych vybarčych kampanij, uvohule niama hrafy «suprać usich». Tam paznačanaja ahulnaja kolkaść ludziej, što prahałasavali, kolkaść hałasoŭ za kožnaha z kandydataŭ u prezidenty, a taksama ličba niadziejnych biuleteniaŭ.

Tak vyhladajuć vynikovyja tablicy vybaraŭ za 2006 hod. Hrafy «suprać usich» niama.

Pavialičyć

Padobna na toje, što kamandy ludziej, jakija ŭvodzili abahulnienyja ličby pa Mahiloŭskaj i Homielskaj abłaściach, vyrašyli spraścić sabie zadaču. I stvarali vynikovuju statystyku pa šmat jakich rajonach, uvohule nijak nie bieručy da ŭvahi hałasy «suprać usich». Takoj hrafy ŭ vynikovych tablicach nie było, tamu i šmatlikija nuli ich nie źbiantežyli.

U vynikach prezidenckich vybaraŭ 2010 i 2015 hadoŭ, dzie ŭžo paznačajecca ličba tych, chto prahałasavaŭ «suprać usich», takich anamalij z hałasami «suprać» pa Mahiloŭščynie i Homielščynie niama, jak i pa inšych rehijonach Biełarusi ich niama.

Tak vyhladajuć vynikovyja tablicy vybaraŭ za 2015 hod. Jość asobnaja (pieradapošniaja) hrafa «Suprać usich». I ŭžo niama nivodnaha rajona krainy, dzie «suprać usich» nichto b nie prahałasavaŭ.

Pavialičyć

Nižej pryviedzienaja jašče adna karta, što adlustroŭvaje aficyjnyja ličby hałasavańnia «suprać usich» pa ŭsich rajonach Biełarusi.

Kolkaść hałasoŭ «Suprać usich» pa rajonach krainy na prezidenckich vybarach 2006 hoda. 

Pavialičyć

Zaŭvahi: za vyklučeńniem najvialikšych haradoŭ krainy. U biełym kolery rajony, dzie «suprać usich», pavodle aficyjnych dadzienych, nie vyjavili nivodnaha biuletenia, a ŭ čyrvonym kolery — rajony, dzie musiać być niemahčymyja admoŭnyja pakaźniki hałasavańnia «suprać usich».

Krynica aficyjnych dadzienych z vynikami vybaraŭ-2006: sajt CVK, dublikat.

• 0
• 0
• 0
• 0
• 0
• 0
• 0
• 0