Sustreča baćkoŭ, čyje dzieci vučacca ŭ škole №36 z polskaj movaj navučańnia, z pradstaŭnikami Ministerstva adukacyi adbyłasia 6 sakavika. Nahodaj staŭ novy prajekt Kodeksa ab adukacyi, źmieny ŭ jakim tyčacca, u pryvatnaści, movy vykładańnia. Baćki bajacca, što praz heta polskaja mova i tradycyi buduć kančatkova vycieśnieny sa škoły, čynoŭniki apielujuć da lepšych umovaŭ sacyjalizacyi vučniaŭ i nieabchodnaści zdavać ekzamieny na dziaržaŭnaj movie. Žurnalistaŭ na sustreču nie puścili.
Moŭnaje pytańnie ŭ polskaj škole padymajecca nie pieršy raz. U 2014 hodzie jano paŭstała taksama ŭ suviazi ź mierkavanymi źmienami ŭ Kodeksie ab adukacyi, u 2012 — kali ŭ škole prapanavali stvarać ruskamoŭnyja kłasy. Zaraz sustreča stała reakcyjaj uładaŭ na list suprać źmien u zakanadaŭstvie, jaki padpisali 380 baćkoŭ.
Na sustreču pryjechała namieśnica načalnika ŭpraŭleńnia ahulnaj siaredniaj adukacyi Ministerstva adukacyi Iryna Karžova. Jana raspaviała ab prapanavanych dapaŭnieńniach u Kodeks, što praduhledžvajuć abaviazkovaje vykładańnie na adnoj ź dziaržaŭnych movaŭ historyi i hieahrafii Biełarusi, hramadaznaŭstva i niekatorych inšych pradmietaŭ. Pieralik ich moža być pašyrany pa žadańniu baćkoŭ. Abnoŭleny kodeks taksama praduhledžvaje praviadzieńnie na adnoj ź dziaržaŭnych movaŭ vypusknych ekzamienaŭ. Tut składanaści ŭ vučniaŭ mohuć uźniknuć, naprykład, z matematykaj — zaraz jaje, jak i astatnija dakładnyja navuki, vyvučajuć pa-polsku.
Pavodle pradstaŭnički ministerstva, vykładańnie niekatorych pradmietaŭ pa-rusku ci pa-biełarusku palepšyć umovy sacyjalizacyi dziaciej u hramadstvie, dazvolić im bolš paśpiachova zdavać ekzamieny i praciahvać navučańnie nie tolki ŭ Polščy.
Baćki apielujuć da taho, što mahčymaść vučycca na dziaržaŭnych movach prapanujecca dziasiatkami škoł horada, a dla tych, chto vybraŭ polskamoŭnaje navučańnie, źniknie adzinaja mahčymaść navučańnia na rodnaj movie. Što da viedaŭ abiedźviuch dziaržaŭnych movaŭ, to dzieci vałodajuć imi svabodna — palapšać niama čaho.
Taksama baćki ŭzhadvali pra polska-biełaruskuju damoŭlenaść, pavodle jakoj heta škoła, pabudavanaja za polskija hrošy, pavinna vykarystaŭvacca tolki dla navučańnia na polskaj movie.
Dyrektarka škoły №36 i čynoŭniki ad adukacyi rezka admovilisia ad kamientaroŭ. «Heta naša ŭnutranaje pytańnie», — skazali jany žurnalistcy Hrodna.life dy zahadali pakinuć škołu.
Baćki ŭ lutym i sakaviku napisali listy z prośbaj ab dapamozie da Maršałka Sienatu Polščy, Ministra zamiežnych spraŭ, kiraŭnika siejmavaj kamisii pa spravach palakaŭ za miežami i da ambasadara dy konsuła Polščy ŭ Minsku i Hrodnie. Adnak dahetul nichto nie adkazaŭ na zvarot baćkoŭ.
Źmieny ŭ kodeksa zakranuć na Hrodzienščynie jašče try škoły nacyjanalnych dyjaspar — polskuju škołu ŭ Vaŭkavysku i dźvie ŭ Astravieckim i Voranaŭskim rajonach, dzie navučańnie viadziecca pa-litoŭsku.
Prajekt Kodeksa ab adukacyi byŭ apublikavany ŭ lutym 2017 hoda i zaraz prachodzić praceduru hramadskaha abmierkavańnia. Jon maje być vyniesieny na razhlad Pałaty pradstaŭnikoŭ da lipienia.
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary