MUS: Da 1 studzienia 2019 hoda ŭ Biełarusi buduć uviedzienyja bijamietryčnyja pašparty i ID-karty
Bijamietryčnyja pašparty biełarusam pačnuć vydavać z 1 studzienia 2019 hoda, paviedamiŭ u efiry internet-telebačańnia «SB» načalnik Departamienta pa hramadzianstvie i mihracyi MUS Biełarusi pałkoŭnik milicyi Alaksiej Biahun.
Jak patłumačyŭ Alaksiej Biahun, u bijamietryčnym pašparcie budzie elektronny čyp ź piersanalnymi dadzienymi ŭładalnika dakumienta — fota, elektronny ličbavy podpis, adbitki palcaŭ.
Hety pašpart dazvolić biełarusam chutčej prachodzić kantrol na miažy. Akramia taho, bijamietryčny dakumient nieabchodny dla spraščeńnia vizavaha režymu z krainami Šenhiena — heta adna z umoŭ ES.
Pa bijamietryčnych pašpartach biełarusy ŭ asnoŭnym buduć vyjazdžać za miažu. Unutranym dakumientam, jak u jeŭrapiejcaŭ, budzie ID-karta.
— Z 1 studzienia 2019 hoda my ŭviadziem i bijamietryčnyja pašparty, i ID-karty, — paviedamiŭ načalnik Departamienta pa hramadzianstvie i mihracyi MUS.
Adrazu mianiać pašparty na novyja budzie nie treba, pa słovach Alaksiej Biahuna, pieršy čas buduć dziejničać abodva pašparty — i zvyčajny, i bijamietryčny.
Darečy, pa prahnozach načalnika departamienta, pieramovy ź Jeŭrasajuzam ab źnižeńni koštu šenhienskich viz i spraščeńni ich atrymańnia mohuć być zavieršany ŭžo ŭ hetym hodzie.
Kamientary