Supracoŭnikami adździeła kryminalnaha vyšuku Frunzienskaha RUUS stalicy pa padazreńni ŭ ździajśnieńni sieryi chulihanstvaŭ zatrymany 26-hadovy žychar Iŭjeŭskaha rajona Hrodzienskaj vobłaści, pieradaje pres-słužba viedamstva.
Ranicaj u milicyju źviarnułasia žančyna i paviedamiła, što prykładna ŭ 5 hadzin 30 chvilin, kali jana išła na pracu, u rajonie stancyi mietro Spartyŭnaja na jaje napaŭ nieviadomy mužčyna, jaki pasprabavaŭ paciahnuć jaje, schapiŭšy za vałasy, u lesaparkavuju zonu. Akazvajučy supraciŭ napadniku, žančyna atrymała traŭmu — złamyśnik złamaŭ joj nahu i, nie damohšysia žadanaha, uciok u nieviadomym kirunku. Paciarpiełaj udałosia zapomnić prykmiety chulihana i pieradać ich pravaachoŭnikam.
Praz hadzinu ŭ milicyju źviarnułasia jašče adna minčanka, jakaja paviedamiła pra napad na jaje mužčyny z padobnymi prykmietami. Ranicaj hetaha ž dnia jana išła na pracu. Na prypynku čakała hramadski transpart. Raptam z-za śpiny padyšoŭ mužčyna i zakryŭ joj rot rukoj. Žančynie ŭdałosia vyrvacca z ruk napadnika i zabiehčy ŭ tralejbus. Prajechaŭšy niekalki prypynkaŭ, razam ź joj z hramadskaha transpartu vyjšaŭ i złamyśnik — usiu darohu jon sačyŭ za achviaraj. Mužčyna raspačaŭ druhuju sprobu napadu, adnak i jana akazałasia marnaj — žančyna zabiehła ŭ handlovy centr pa vuł. Piatra Hlebki. Z hipiermarkieta jana patelefanavała ŭ milicyju i paviedamiła pra zdareńnie.
Padčas praviadzieńnia kompleksu apieratyŭna-vyšukovych mierapryjemstvaŭ było vyjaŭlena, što niezadoŭha da sieryi napadaŭ mužčyna adpačyvaŭ u adnoj z zabaŭlalnych ustanoŭ Frunzienskaha rajona h. Minska. Znachodziačysia ŭ stanie ałkaholnaha apjanieńnia, jon pačaŭ ździajśniać chulihanskija dziejańni, paśla čaho adpraviŭsia dadomu ŭ Hrodzienskuju vobłaść.
Apieratyŭnikam spatrebilisia sutki, kab vyznačyć miescaznachodžańnie i zatrymać złamyśnika.
«U dačynieńni da zatrymanaha raspačataja kryminalnaja sprava pa č.1 art.339 ( «Chulihanstva») kryminalnaha kodeksa Respubliki Biełaruś. Sankcyja nazvanaj častki artykuła praduhledžvaje adkaznaść u vyhladzie pazbaŭleńnia voli na termin da 3 hadoŭ», — rastłumačyŭ časovy vykanaŭca abaviazkaŭ pa pasadzie namieśnika načalnika kryminalnaj milicyi Frunzienskaha RUUS h.Minska Alaksiej Maškin.
Viadoma, što zatrymany mužčyna raniej da kryminalnaj adkaznaści nie pryciahvaŭsia.
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary