Viadomy ŭ Francyi fitnies-błohier Rebieka Burhier zahinuła z-za vybuchu sifona dla ŭźbivańnia viarškoŭ.
Pra śmierć dziaŭčyny napisali jaje baćki ŭ fejsbuku, paviedamiŭšy, što doma ź joj adbyŭsia niaščasny vypadak.
Paźniej papiaredžańnie ab niebiaśpiecy niaspraŭnych sifonaŭ-kremieraŭ było apublikavana ŭ jaje akaŭncie ŭ instahramie. Tam ŭdakładniałasia, što aparat vybuchnuŭ i jaho frahmient udaryŭ Rebeku ŭ hrudzi, što pryviało da śmierci.
Francuzskija ŚMI paviedamlali, što jana pamierła ad spynieńnia serca paśla incydentu, niahledziačy na akazanuju joj miedycynskuju dapamohu.
Błohier, jakaja pisała pra fitnies i padarožžy, była dobra viadomaja ŭ Francyi, u jaje było kala 55 tysiač padpisčykaŭ u fejsbuku i 154 tysiačy — u instahramie.
Kulinarny sifon pracuje, upyrskvajučy aksid azotu abo vuhlakisły haz u mietaličny kantejnier. U vyniku ŭnutry bałončyka stvarajecca vysoki cisk, nieabchodny dla haziravańnia vady, marynavańnia abo kandytarskich vyrabaŭ.
Ruch u abaronu pravoŭ spažyŭcoŭ u Francyi na praciahu niekalkich hadoŭ papiaredžvaŭ čytačoŭ ab niaspraŭnaści ŭ sifonie, jakija patencyjna mohuć być niebiaśpiečnymi
Uładalniki pryład atrymlivali roznyja traŭmy - ad złamanych zuboŭ i šumu ŭ vušach da množnych pierałomaŭ i, u adnym vypadku, straty vačej, paviedamlaje časopis 60 Millions. Adnak vydańnie adznačaje, što novyja prybory, vyrablenyja paśla 2015 hoda, pakul vyhladajuć biaśpiečnymi.
U 2013 hodzie achviara sifona raspaviała radyjo RTL: «Ja złamała šeść rebraŭ i hrudzinu. U balnicy mnie skazali, što, kali b ŭdar i vybuch pryjšlisia na vobłaść serca, ja była b užo miortvaja».
Lik padobnych incydentaŭ nastolki vialiki, što ŭ 2014 hodzie francuzskija ŭłady vypuścili papiaredžańnie, dzie adznačałasia, što niaščasny vypadak moža adbycca ŭ luby momant, navat paśla niekalkich hadoŭ vykarystańnia prybora.
Prynamsi adzin vytvorca adklikaŭ svaje pryłady — adnak praz hod tolki 25 tysiač čałaviek viarnuli sifony, choć kuplena było 160 tysiač, pieradaje Le Parisien.
Kamientary