«Kachańnie padčas chalery» vydaduć u «nobieleŭskaj sieryi».
«Dazvołu na vydańnie knihi pa-biełarusku my čakali šeść miesiacaŭ. Mienavita stolki ciahnulisia pieramovy z pravaŭładalnikami litaraturnaj spadčyny Markiesa, — kaža inicyjatar vydańnia Siarhiej Makarevič. — I ŭžo sioleta raman pabačyć śviet».
Niahledziačy na toje, što heta adzin z samych papularnych piśmieńnikaŭ-nabielijantaŭ u śviecie, pa-biełarusku tvory Markiesa asobnaj knihaj vyjduć upieršyniu. Kab realizavać taki prajekt, na sajcie ulej.by zapuścili kraŭdfandynhavuju kampaniju.
Kniha «Kachańnie padčas chalery» vyjšła ŭ 1985 hodzie. Heta pieršy raman, jaki źjaviŭsia paśla atrymańnia aŭtaram Nobieleŭskaj premii. Jon zamacavaŭ viadomaść Markiesa jak najbolš jaskravaha pradstaŭnika litaraturnaha kirunku «mahičny realizm».
«Kachańnie padčas chalery» stanie druhoj knihaj u sieryi «Noblesse oblige» (tvory nobieleŭskich łaŭreataŭ u biełaruskich pierakładach). Raniej pabačyŭ śviet «Hoład» narviežca Knuta Hamsuna.
«Kali admietnych knižak biełaruskich piśmieńnikaŭ vychodzić niedastatkova, značycca, treba vydavać pierakłady suśvietna viadomych tvoraŭ, — kaža Siarhiej Makarevič. — Tolki vysokimi ŭzorami zamiežnaj prozy my možam hadavać svaich aŭtaraŭ i farmiravać husty čytačoŭ».
Pierakłaŭ raman na biełaruskuju Karłas Šerman. Paśla jaho śmierci ŭ 2005 hodzie pierakład u Biełaruś pieradała jaho ŭdava Tamara (Šerman apošnija hady lačyŭsia i žyŭ u Narviehii, dzie i pamior). Z taho času raman čakaŭ vydańnia asobnaj knihaj.
«Karłas Šerman naradziŭsia va Uruhvai, kudy jaho baćka pajechaŭ z Zachodniaj Biełarusi na zarobki jašče da vajny. I ispanskaja mova dla Karłasa stała matčynaj. A maładym čałaviekam u 1956 jon pierajechaŭ u Biełaruś. Tut pačaŭ pierakładać ź biełaruskaj na ispanskuju i naadvarot. A ŭ kancy 1970-ch razam z Valancinam Tarasam vyrašyŭ pierakłaści «Vosień patryjarcha» Markiesa na biełaruskuju movu. Partfunkcyjaniery nie adobryli takuju ideju. Tamu Šerman i Taras pierakłali jaho na ruskuju. I apublikavali na staronkach biełaruskaha časopisa «Nioman», a zatym užo i asobnaj knihaj u Maskvie, — kaža Makarevič. — A što da biełaruskaha pierakładu «Kachańnia padčas chalery» — jon cudoŭny. Ciapier, kali prahladaŭ karekturu knihi, vyrašyŭ paralelna zirnuć i rasijskamoŭny varyjant. U niekatorych miescach razychodžańni istotnyja. Biełaruski pierakład lepšy».
«Noblesse oblige» — sumiesny prajekt dabračynnaha fondu «Viartańnie» i vydaviectva «Januškievič».
Habryjel Harsija Markies (1927—2014) naradziŭsia ŭ Kałumbii, ale bolšuju častku žyćcia pravioŭ u Mieksicy. Nobieleŭski łaŭreat 1982 hoda. Aŭtar knih «Da pałkoŭnika nichto nie piša», «Vosień patryjarcha», «Sto hadoŭ samoty» i inšych. Šerah jaho knih ekranizavany, u tym liku «Kachańnie padčas chalery».
Ciapier čytajuć
Bieź pieśniaŭ Mieładze i ŭ formie: jak projduć vypusknyja ŭ škołach i dziciačych sadkach1
Kamientary