Start fiestyvalu, jaki ŭ hetym hodzie zrabiŭ staŭku na biełaruskamoŭnaść, adbyŭsia ŭ 10.00, ale jaho hałasy nie ścichali jašče vielmi doŭha nočču, navat paśla aficyjnaha zakryćcia z salutam.
Dla śviata ŭ Lidzie pierakryli ŭsie centralnyja vulicy: prosta na ich pracavali fudkorty, ramieśniki i śpiavali miascovyja vuličnyja muzyki, jakija nie trapili ŭ asnoŭnuju prahramu.
Niahledziačy na toje, što arhanizatary ŭličyli pamyłki minułaha hoda i pavialičyli kolkaść punktaŭ ź ježaj i pitvom, a taksama ŭstalavali bolš bijatualetaŭ, i ŭ pieršych, i ŭ druhich miescach niaspynna ŭźnikali vialikija čerhi. Byli jany i kala zabaŭ: tak, kab pralacieć 5 chvilinak na viertalocie za 25 rubloŭ, ludzi čakali paŭhadziny i bolš.
Uličvajučy, što na fiestyval pryjšli nie tolki miascovyja žychary, ale i pryjechali hości z usioj Biełarusi i navat z Polščy, Ukrainy, Łatvii i Litvy, u zonie asnoŭnaj płatnaj sceny, dzie vystupali chedłajniery — «Pietla Pristrastija», «Krambambula», «Lumen» i «Okiean Jelzi», — było vielmi ciesna. Ciskanina, kali ciažka stała ŭžo varušycca i tančyć, pačałasia padčas vystupu druhoha pa liku ŭdzielnika prahramy, «Krambambuli»: hurt padrychtavaŭ jakasnaje šou ź jarkim videašeraham.
Pamiž pieśniami Volski vioŭ z hledačami žyćciovyja dyjałohi, žartavaŭ nakont słabaha mastackaha ŭzroŭniu «Dzieciukoŭ», jakich nie puścili na fest, hučali kryki «Žyvie Biełaruś», u pavietra padymalisia bieł-čyrvona-biełyja ściahi. Kali na desiert muzyki zajhrali «Try čarapachi», natoŭp zusim było nie strymać.
Kab nie šturchacca, mnohija pakidali asnoŭnuju hladzielnuju placoŭku i słuchali vystupy krychu zdalok, kala miascovaha pałaca kultury. Niekatoryja ludzi pieršapačatkova nie nabyvali kvitok u płatnuju zonu i adčuvali siabie vydatna: huk i karcinka byli vielmi dobryja, tamu tančyć i śpiavać možna było i ŭ inšych punktach Lidy.
Hałoŭny chedłajnier «Lidbeer-2017» «Okiean Jelzi» vyjšaŭ na scenu z amal hadzinnym spaźnieńniem. Pakul muzykanty rychtavalisia, hledačoŭ na čystaj biełaruskaj movie zabaŭlaŭ viadučy, jaki, vidavočna, za viečar sarvaŭ svaje hałasavyja źviazki i vykrykvaŭ repliki z apošnich sił: heta vielmi rezała słych i mnohich razdražniała.
Adnak fanaty Vakarčuka i jaho hrupy, kali tyja, narešcie, źjavilisia na scenie daravali jamu ŭsio: tym bolš, što heta adzin z apošnich vystupaŭ hrupy, paśla muzyki voźmuć pierapynak u tvorčaści na hod.
Paśla festu ludziej čakaŭ hałoŭny kvest: dajechać dadomu. Zatory na vyjeździe ź Lidy byli vialikija.
Ciažki dzień paśla #lidbeer )) pic.twitter.com/yS5xRcEU3Q
Kamientary