U Paŭnočnym pasiołku źniasuć tolki tyja 69 damoŭ, na miescy jakich pabudujuć darohi

Administracyja Zavodskaha rajona zaprašaje ŭziać udzieł u hramadskim abmierkavańni horadabudaŭničaha prajekta detalovaha płanavańnia terytoryi ŭ miežach vulic Anharskaj — Bajkalskaj — łandšaftna-rekreacyjnaj zony — zavułka Bałotnikava — vulic Hierasimienka — Nieścierava. Heta ŭžo nie pieršaja karekciroŭka raspracavanaha raniej PDP. Što prapanujuć u hety raz, daviedvałasia karespandent ahienctva «Minsk-Naviny».

Raźmiaščeńnie šmatkvaternych damoŭ z ubudavanymi abjektami hramadskaha absłuhoŭvańnia płanujuć na volnaj terytoryi na skryžavańni vulic Arcioma i Čakalina. Pa płanach architektaraŭ, tut možna ŭźvieści 8,4 tysiačy m² žylla. Adnak, praanalizavaŭšy zapaŭnialnaść najbližejšych ustanoŭ adukacyi i ŭličvajučy ich pierapoŭnienaść, aŭtary prajektu zaŭvažajuć: zasvajeńnie učastkaŭ pad novaje šmatkvaternaje budaŭnictva naŭrad ci mahčyma ŭ najbližejšy čas.

Na svabodnych učastkach abo na ziemlach, vyłučanych raniej haradžanam dla aharodnictva, miarkujecca budaŭnictva novych katedžaŭ abo kompleksaŭ taŭnchaŭsaŭ. Ziamlu zvyčajna realizujuć praz aŭkcyjony. Jakija ž placoŭki abranyja dla hetych metaŭ?

— U zavułku Ałtajskim pamiž isnujučymi damami №96 i 122 na volnaj terytoryi, jakaja prymykaje da łandšaftna-rekreacyjnaj zony (pry ŭmovie asušeńnia hetaj terytoryi i kompleksnaha jaje asvajeńnia);

— u miežach vulic Fučyk — Bahrany — zavułka Bałotnikava — vulicy Anharskaj na volnaj terytoryi, raniej praduhledžanaj dla raźmiaščeńnia abjekta hramadskaha charčavańnia, jaki tut akazaŭsia niezapatrabavanym;

— u miežach vulic Fučyk — Bahrany — zavułkaŭ Bałotnikava i Bahranaha, dzie raźmieščana aŭtastajanka № 80 HA «Haražy, aŭtastajanki i parkoŭki» pry ŭmovie jaje vynasu i kompleksnaha asvajeńnia placoŭki.

Taksama na terytoryjach kvartałaŭ siadzibnaj zabudovy vyznačany adzinkavyja ŭčastki dla katedžnaha budaŭnictva.

Na vulicy Nieścierava na miescy byłoj dyśpietčarskaj stancyi ŭ pierśpiektyvie namiečana ŭźvieści šmatfunkcyjanalny kompleks płoščaj kala 5 tysiač m². Inšyja abjekty hramadskaha absłuhoŭvańnia prapanujecca raźmiaścić uzdoŭž asnoŭnych žyłych vulic, pieravažna na svabodnych placoŭkach, jakija prymykajuć da siadzibnaj zabudovy.

Prajektam namiečana i budaŭnictva kompleksu šmatpaviarchovych haražoŭ-stajanak z prybudavanymi hramadskimi abjektami na skryžavańni vulicy Ałtajskaj i zavułka Bałotnikava. Učastak raźmieščany na volnaj terytoryi i častkova na miescy siadzibaŭ № 222, 224 i 226a na vulicy Ałtajskaj, jakija prapanujecca źnieści. Masiŭ boksavych haražoŭ HSK «Hudok» i HK «Paŭnočny-65» płanujuć taksama zamianić šmatpaviarchovymi parkinhami, kab uładkavać na hetym miescy bolš mašyna-miescaŭ. Adnak padobnyja płany horadabudaŭnikoŭ zvyčajna zastajucca tolki na papiery, pakolki nie znachodzicca kampanij, jakija žadajuć zajmacca znosam boksavych haražoŭ i nastupnym ŭźviadzieńniem na ich miescy parkinhaŭ.

Płanujecca znos 69 pryvatnych damoŭ, ź ich 62 traplajuć pad pierśpiektyŭnaje pašyreńnie mahistralnych vulic, 2 — pad budaŭnictva hramadskich i 5 — kamunalnych abjektaŭ.

Hramadskaje abmierkavańnie projdzie z 19 sakavika pa 12 krasavika. Prezientacyja prajekta adbudziecca 21 sakavika ŭ 18:00 u siaredniaj škole №172 (vulica Achockaja, 141). Z prajektnymi materyjałami možna aznajomicca z 19 sakavika pa 2 krasavika ŭ administracyi Zavodskaha rajona (słužba «Adno akno»). Zaŭvahi možna pakinuć da 12 krasavika ŭ žurnale dla zaŭvah i prapanoŭ albo nakiravać u administracyju rajona z paznakaj «Hramadskaje abmierkavańnie» (paštovy adras: 220026, h. Minsk, vulica Žyłunoviča, 17; elektronny adras: [email protected] ).

• 0
• 0
• 0
• 0
• 0
• 0
• 0
• 0