Mitrapalit Pavieł: Biełaruskaja pravasłaŭnaja carkva — heta małaja častka Ruskaj pravasłaŭnaj carkvy
U piatnicu, 20 krasavika, u chramie Usich śviatych adbyŭsia fiestyval «Čas dabra», arhanizavany BRSM — tam jany sabrali svaich aktyvistaŭ, jakija adznačylisia vałanciorstvam pry adnaŭleńni relihijnych śviatyń.
Prysutničali pradstaŭniki ŭsich biełaruskich kanfiesij: ad pravasłaŭnych byŭ mitrapalit Pavieł, jaki adkazaŭ na šerah pytańniaŭ «Našaj Nivy».
Najpierš my pacikavilisia, navošta mitrapalit Pavieł zaklikaje pravieści ŭ Minsku sinod RPC, choć Biełaruskaja pravasłaŭnaja carkva maje svoj.
Čytajcie taksama. U piku vizitu Papy ŭ Vilniu mitrapalit Pavieł źbirajecca pryvieźci patryjarcha Kiryła ŭ Minsk
«Tak, u nas jość sinod BPC, — pačaŭ Pavieł, — ale jość i śviaščenny sinod RPC. My — adzinaja śviataja Ruskaja pravasłaŭnaja carkva. Biełaruskaja pravasłaŭnaja carkva — heta małaja častka Ruskaj pravasłaŭnaj carkvy. Tamu my zaŭsiody rady bačyć našaha pieršaśviatara. U Biełarusi takoj padziei jašče nie było, kaliści treba pačynać. I praviadzieńnie sinoda — heta padviadzieńnie šmatviekavych rabot śviatoj Ruskaj pravasłaŭnaj carkvy na terytoryi Biełarusi. Dabrasłaŭleńnie patryjarcha budzie znakavym. Viedajecie, kali dzieci pryjazdžajuć da baćkoŭ, jany zaŭsiody dzielacca svaimi ŭražańniami, i dla nas śviaciejšy patryjarch Kirył — heta naš baćka. My padzielimsia svaimi dasiahnieńniami».
Dalej mitrapalit raskazaŭ pra situacyju ź biełaruskim hramadzianstvam — jaho Pavieł dahetul nie atrymaŭ, chacia, pavodle zakonu, musić jaho mieć. Tut mitrapalit apieluje da jurydyčnaj supiarečnaści.
«Usio idzie ŭ mianie pa zakonie. Što datyčyć prava pražyvańnia, to ŭ mianie tut usio aformlena. Ja tut doma. Ale čas, za jaki robicca hramadzianstva, jašče nie prajšoŭ», — skazaŭ jon.
Taksama my nahadali mitrapalitu padziei sakavika: tady jon kazaŭ, što BPC nie budzie pravodzić mierapryjemstvaŭ, pryśviečanych stahodździu BNR, ale ŭrešcie na śviacie la Opiernaha vystupiŭ prataijerej Siarhiej Lepin, jaki pračytaŭ pramovu i skončyŭ jaje słovami «Žyvie Biełaruś!». Dyk što paŭpłyvała na źmienu pazicyi?
«My nie možam niešta zabaranić ci dazvolić — Lepin vystupiŭ sam ad siabie, — skazaŭ mitrapalit Pavieł. — Luby moža vystupać, u nas carkva svabodnaja. Abviaščeńnie BNR jak histaryčny fakt ja pryznaju, ale byvaje inšaje — carkvu siońnia sprabujuć uciahnuć u palityku, a jany pavinna być pa-za palitykaj. Kali ja stanu na niejkuju pazicyju, to heta adviernie ad carkvy ludziej inšych pierakanańniaŭ».
«A što tady vy dumajecie pra palityčny akurat skandał z zajavami patryjarcha Kiryła ŭ Bałharyi?» — spytali my.
Čytajcie taksama. Vice-premjer Bałharyi: I patryjarch Kirył, hety ahient KHB «Michajłaŭ», maje nachabstva vučyć nas «iścinie»?
«Nie viedaju, nie čuŭ. A adkul ja viedaju?» — skazaŭ mitrapalit.
Skončyłasia razmova razvahami pra aŭtakiefaliju — pačali z Ukrainy, dzie, mierkavana, urešcie ŭ pravasłaŭnych źjavicca aŭtakiefalija.
Čytajcie taksama. Parašenka: Kanstancinopal daść aŭtakiefaliju Ukrainskaj pravasłaŭnaj carkvie
«Va Ukrainie žyvie, dziejničaje i isnuje pravasłaŭnaja carkva, kananičnaja carkva. Što tam adbylisia raskoły — heta biada, — skazaŭ mitrapalit Pavieł. — Ja za toje, kab usie, chto adkałoŭsia, viarnulisia va ŭłońnie carkvy. Tam jość kananičnaja carkva, jakuju ŭznačalvaje mitrapalit Anufryj. Što datyčyć Biełarusi, to nam i tak niakiepska. Ad dabra dabra nie šukajuć. Ja niejak havaryŭ z adnym karespandentam niamieckim, i jon u mianie taksama spytaŭ: «Čamu vy nie prosicie aŭtakiefalii?». Ja ŭ jaho spytaŭ, jakoha jon vieravyznańnia. Jon katalik. I ja kažu, a vy paprasicie ŭ Papy Rymskaha dla Hiermanii aŭtakiefalii! Tut kananičnaja terytoryja Patryjarcha».
My zaŭvažyli, što toj ža Połack chryściŭsia, kali jašče pra Maskvu nie čuli.
«Mała ci što tam było ci nie było, ciapier heta kananičnaja terytoryja Ruskaj carkvy. Ja z vami budu havaryć na hetuju temu bieź mikrafona», — skončyŭ mitrapalit.
Ciapier čytajuć
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii
Kamientary