1 vierasnja ŭ Muziei narodnaj architektury i pobytu pad Minskam pry padtrymcy AAT «Bank BiełVEB» adbudziecca jubilejny — dziasiaty pa liku — fiestyval «Kamianica». Arhanizatary abviaścili troch pieršych chedłajnieraŭ i zapuścili ŭ prodaž pieršyja 500 kvitkoŭ pa 10 rubloŭ.
Pieršaja «Kamianica» datujecca 2009 hodam. Za hety čas fiestyval prajšoŭ vialiki šlach, ale zachavaŭ hałoŭnaje — cikaŭnaść da narodnaj muzyki va ŭsich jaje prajavach. Ad aŭtentyčnych napievaŭ bieź instrumientalnaha supravadžeńnia da apracovak u sučasnych muzyčnych stylach i aŭtarskich tvoraŭ, natchnionych narodnaj tvorčaściu. Dadzienuju kancepcyju adlustroŭvajuć i chedłajniery hetaha hoda.
«Troica» (Biełaruś)
Etna-trya «Troica» na čale ź Ivanam Kirčukom nie darma nazyvajuć «šamanami» — ich vytančanyja apracoŭki narodnych piesień niasuć słuchačoŭ daloka ŭ kosmas. Kalektyŭ pradstavić na fiestyvali svaje lepšyja pieśni i šerah kampazicyj z novaha alboma «Car-ahoń», jaki vyjdzie ŭ vieraśni.
Joryj Kloc (Ukraina)
Nieardynarny hurt ź Lvova, stylistyku jakoha nazyvajuć «ukrainskim abradavym chip-chopam», «turba-fołkam» i «kazackim brejkbitam». Dyski kalektyva vydavalisia va Ukrainie i Polščy, dzie muzyki aktyŭna kancertujuć.
«Tiesto» (Rasija)
Muzyčnaja farmacyja z Sankt-Pieciarburha, jakaja vykonvaje tradycyjnyja fołk-napievy tak, jak ich čuje sučasny žychar vialikaha horada. U vyniku atrymlivajucca tancavalnyja kampazicyi z vykarystańniem žyvych i elektronnych instrumientaŭ, z adychodam u dram-n-bejs i dab, fank i chip-chop.
Pieršyja 500 kvitkoŭ na fiestyval kaštujuć 10 rubloŭ. Nabyć ich možna tolki z 7 da 10 žniŭnia ŭ ofisie Muzieja narodnaj architektury i pobytu — Minsk, Kalvaryjskaja d.17, k.614. Čas pracy: z 10:00 da 16:30.
Dalej košt kvitka dla darosłych budzie składać 15 rubloŭ (da 25 žniŭnia) i 20 rubloŭ (z 25 žniŭnia). Pry prodažy praz Kvitki.by budzie dadavacca kamisija 3 rubli.
Praduhledžanyja lhoty dla školnikaŭ i studentaŭ. Uvachod na fiestyval dla hledačoŭ u poŭnych viersijach nacyjanalnych strojaŭ (ad hałaŭnych uboraŭ da abutku) budzie biaspłatnym. Čas praviadzieńnia: z 12 da 22 hadzin. Infalinija: (033) 661-14-32, (017) 209-41-63.
Ciapier čytajuć
Mielnikava dvojčy była na palihrafie. Pieršy raz raspłakałasia i ŭciakła1
Kamientary