U Miensku zrabili zvyšsučasny tramvaj — praŭda, nie dla biełarusaŭ, a dla maskvičoŭ.
Na «Biełkamunmašy» zmajstravali pieršy biełaruski tramvaj ź nizkaj padłohaj. 25-metrovaja mašyna moža moža źmiaščać ažno 230 pasažyraŭ. Raspracoŭvali jaho admysłova pad eŭrapiejskija standarty — ale na rejki tramvaj pastaviać, jak miarkujecca, u Maskvie.
Što da Miensku, dyk u nas buduć pakul što jeździć taksama novyja, ale ŭžo nie takija sučasnyja tramvai AKSM-743:
Zrešty, nie zaŭždy novaje lepiej za staroje. Ciažka skazać, ci budzie novy tramvaj sapraŭdy bolš zručnym dla pasažyraŭ: na videa bačna, što ŭ novaj «maskoŭskaja» madeli kresły dla siadzieńnia vysoka ŭźniatyja nad padłohaj na admysłovyja boksy, u jakija schavanaja chadavaja častka tramvaja. Plus takoj kanstrukcyi ŭ tym, što padłohu možna zrabić bolš nizkaj — pasažyram nia treba zachodzić u taki tramvaj pa stromych prystupkach. Ale jość i minus: tyja pasažyry, jakija jeduć stojačy, musiać prasoŭvacca pamiž kresłami, niby ŭ vuzkim žełabie. Padobnuju prablemu ŭžo zaŭvažyli tyja, kamu «paščaściła» jechać u «hadzinu pik» u novaj madeli haradzkoha aŭtobusa MAZ 203:
Tam taksama dla taho, kab apuścić padłohu, ŭźniali siadzieńni dy zrabili nadta niazručny vuzki prachod miž šerahami kresłaŭ, dobra bačny na zadnim planie:
Tak što, chaj «Biełkamunmaš» pakul pratestuje novy tramvaj na maskvičach — a my pahladzim, jakija buduć uražańni. Zrešty, źniešnie novy tramvaj sapraŭdy vyhladaje pa-eŭrapiejsku – nia horš za tyja, jakija jeździać pa vulicach, skažam, Barselony:
U lubym vypadku, transpartnyja novaŭviadzieńni, na žal, najpierš datyčacca stalicy. Kali pa Miensku spres hojsajuć novyja zialonyja aŭtobusy-MAZy, dyk ŭ abłasnych centrach jašče psujuć atmasferu dabityja «ikarusy». Varta spadziavacca, što ekspart novych tramvajaŭ u Maskvu pojdzie dobra, i ŭ dziaržavy źjaviacca hrošy na toje, kab abnavić tramvajny park nia tolki ŭ Miensku, ale i ŭ inšych biełaruskich haradach.
Ciapier čytajuć
Maŭrykij, Siejšeły, Šry-Łanka i nie tolki: pahladzieli, kudy źbiehli ad biełaruskich marazoŭ praŭładnyja artysty i viadučyja8
Kamientary