Novy artykuł staršyni Kanstytucyjnaha suda Rasii Valeryja Zorkina ŭ «Rasijskaj haziecie» pra nieabchodnaść źmienaŭ u rasijskaj kanstytucyi vyklikaŭ burnuju reakcyju ŭ rasijskim hramadstvie. Pieciarburhskaje vydańnie «Fontanka» adznačaje, što pytańnie źmianieńnia rasijskaj kanstytucyi źviazana z tak zvanaj «Prablemaj-2024», bo ciapierašniaja rasijskaja kanstytucyja nie daje mahčymaści Uładzimiru Pucinu zastavacca prezidentam Rasii paśla 2024 hoda. A sychodzić sa svajoj pasady jon, zdajecca, nie źbirajecca. I adzin z varyjantaŭ vyrašeńnia «Prablemy-2024» — stvareńnie na bazie sajuza Biełarusi i Rasii novaj dziaržavy, prezidentam jakoj moh by stać Pucin.
«Fontanka» adznačaje, što luby rasijski samadzieržac nikoli ŭ adstaŭku nie padavaŭ. Było adno ščaślivaje vyklučeńnie — Barys Jelcyn. Prybrać abmiežavańnie pa terminach, viadoma, tearetyčna možna, ale vychad heta drenny. Litaralna fizična adčuvajecca siońnia niepapularnaść takoha kroku ŭ Rasii.
Najlepšaje vyjście — heta ŭspomnić prajekt abjadnańnia Rasii ź Biełaruśsiu, ličyć «Fontanka». Heta daść mahčymaść Pucinu kiravać pavodle novaj kanstytucyi jašče hadoŭ 12 (da 2036 h.) albo navat daŭžej, ź inšaha boku — Rasija atrymlivaje Krym-2. Rasijanie zabuduć pra ciažkaje žyćcio i ščyra paradujucca viartańniu «spradviečnych ziamiel».
Pavodle scenaru «Fantanki», Łukašenku ŭ takoj situacyi mohuć paabiacać pasadu vice-prezidenta z masaj roznych dabrotaŭ i harantyj niedatykalnaści. Biełaruś nadzialajecca admysłovymi pravami i vysokaj stupieńniu samastojnaści. Łukašenka praciahvaje vykonvać funkcyi prezidenta, ale, naturalna, z abmiežavanymi paŭnamoctvami:
«Rasija — impierskaja kraina. I biełaruskaje pytańnie joj pryjdziecca rana ci pozna vyrašać. Kinuć hetuju krainu ruchacca pamaleńku na Zachad pa miery źmieny pakaleńniaŭ — usio roŭna što addać Krym Ukrainie. Tak što rasijskim kiraŭnikam tak ci inakš, ale daviadziecca niejak reahavać. Čamu b nie sumiaścić važnaje z karysnym: umacavańniem prezidenckaha samadziaržaŭja?»
— piša «Fontanka».
Čytajcie taksama:
Uładzisłaŭ Inaziemcaŭ: Dla padtrymańnia patryjatyčnaha čadu Rasii treba akupavać ciapier cełuju krainu. I kandydat tut tolki adzin
Rosbałt: Adziny šaniec Pucina zastacca va ŭładzie i padniać svoj rejtynh — dałučyć Biełaruś
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary