Ja hladzieŭ pieršuju słužbu pradstajalnika Pravasłaŭnaj Carkvy va Ŭkrainie (PCU), mitrapalita Kijeŭskaha i ŭsiaje Ukrainy Jepifanija, u zapisie. Cikava było, ci ŭžo ličyć jon siabie «kaleham» pradstajalnikaŭ inšych pamiesnych cerkvaŭ. I kali na Vialikim uvachodzie Jepifanij paminaŭ pradstajalnikaŭ inšych cerkvaŭ, ja hety epizod prakruciŭ jašče raz, bo ź pieršaha razu nie pačuŭ imia Kiryła Maskoŭskaha.
Pamyłki nie było: małady (39-hadovy) i tolki ŭčora abrany pradstajalnik novaj aŭtakiefalnaj Carkvy vyrašyŭ (sam ci z padkazki inšych uładykaŭ) nie paminać varoža nastrojenaha hałavu Maskoŭskaj Carkvy. Ja pazvaniŭ adnamu pravasłaŭnamu biełarusu, spačuvalniku ŭkrainskaj aŭtakiefalii, i skazaŭ, što pamianuć Kiryła treba było.
Pamianuć Kiryła treba było choć by tamu, što nie ŭsie vierniki Maskoŭskaj Carkvy jak u samoj Rasii, tak i ŭ inšych postavieckich dziaržavach varoža nastaŭlenyja da Ukrainy i aŭtakiefalii PCU. Pamianuć Kiryła treba było i tamu, što sam Isus Chrystos vučyŭ lubić vorahaŭ i błasłaŭlać tych, chto klanie ciabie. Heta jakraz toj vypadak, kali treba być vyšejšym za kryŭdy i pakazvać: voś jany plavuzhajuć na nas, jany nie žadajuć nam dabra, ale my molimsia za ich. U takim razie novaja Carkva i jaje pradstajalnik buduć nie tolki pakazvać viernaść zapavietam Isusa z Nazareta, ale i maralna stajać vyšej za Kiryła i tych, chto jaho padtrymlivaje va ŭkrainskim pytańni.
U jakaści ž pastskryptuma dadam, što z 15 śniežnia kiraŭnik ukrainskaj filii Maskoŭskaj Carkvy Anufryj (Bierazoŭski) straciŭ tytuł mitrapalita Kijeŭskaha i ŭsiaje Ukrainy, bo, jak pradpisajuć kanony, u adnym horadzie nie moža być dvuch biskupaŭ. Dla Kanstancinopala z suboty 15 śniežnia ŭ Kijevie jość tolki mitrapalit Jepifanij.
Kamientary