Biełaruska znajšła va ŭpakoŭcy siemak miortvaha vierabja: «Stała adsypać — z pakieta pakazalisia nohi ptuški»
«Razarvała pakiet i stała ź jaho pakrychu adsypać siemki, ale potym adtul pakazalisia łapki ptuški. Samaje žudasnaje, što ja ŭžo pałovu siemak adtul paśpieła źjeści», — uspaminaje hamialčanka Jaŭhienija, jakaja zapeŭnivaje, što znajšła va ŭpakoŭcy siemak miortvaha vierabja. Vytvorca ž kaža, što čysta technična taki bujny abjekt u cechu trapić u pakiet nie moža.
Jaŭhienija Samojlik žyvie ŭ Homieli, jana dasłała ŭ redakcyju TUT.BY fatahrafiju vierabja, jakoha znajšła va ŭpakoŭcy siemak.
— Kuplała hetyja siemiečki ŭ «Jeŭraopcie» na vulicy Chatajeviča ŭ Homieli 27 śniežnia. Pakunak vialiki — na 400 hramaŭ. 31 śniežnia dastała pakiet i stała ź jaho pakrychu adsypać siemki, ale potym z pakieta pakazalisia łapki, — uspaminaje Jaŭhienija. — Samaje žudasnaje, što ja ŭžo pałovu siemak adtul paśpieła źjeści. Ciapier pieražyvaju, kab ničym nie zaraziłasia.
Hamialčanka raspaviadaje, što ŭ toj ža dzień napisała elektronnyja listy ŭ Respublikanski centr hihijeny i epidemijałohii (adkazu pakul niama), a jašče — vytvorcu, adras jakoha byŭ paznačany na ŭpakoŭcy.
Učora, 3 studzienia, dziaŭčyna adniesła pakiet u kramu.
— Tam adreahavali adekvatna, sami byli ŭ šoku, skazali, što buduć raźbiracca, i hrošy za siemki viarnuli, — raspaviadaje Jaŭhienija.
Čytačka dadaje, što nie zaŭvažyła, kab ŭpakoŭka siemak była parušanaja — jana była ščylna zapajanaja, jak zaŭsiody.
— Kali heta čyjści durny žart — to pažartavali z usich, u tym liku ź mianie. U mianie niama mety kahości ačarnić, pradstaŭniki vytvorcy vietliva sa mnoj razmaŭlajuć, prapanujuć kampiensacyju. Ale razam z tym ja razumieju, što vierabiej u siemkach — heta nienarmalnaja situacyja.
Na zdymku ad čytački — upakoŭka siemak kampanii «Nikicin», vytvorčaść znachodzicca ŭ Łahojsku Minskaj vobłaści. Tam zapeŭnivajuć: nie moža być, kab padčas vytvorčaści ŭ pakiet trapiŭ vierabiej.
— Čysta technična taki bujny abjekt patrapić u pakiet nie moža, — raskazvajuć na pradpryjemstvie. — My atrymlivajem syravinu, absmažvajem jaje, potym siemki ssypajem u kantejniery, paśla čaho ŭsio idzie va ŭpakovačny cech. Tam siemki ssypajuć u bunkier.
Kampanija dasłała fatahrafii abstalavańnia dla ŭpakoŭki siemak.
— Heta bunkier, kudy traplajuć prapražanyja siemki. Tam kraty, praź jakija nijaki bujny pradmiet nie projdzie. Sietka pryvaranaja, jana nie padymajecca. Za kratami — truba z dazataram, jaki admiaraje porcyju siemak, na hetuju trubu nadziavajuć upakovačnaje «rukavo». Źnizu «rukavo» zapajvajecca, dazatar adsypaje ŭ trubu siemki, hatovuju ŭpakoŭku zapajvajuć i adsiakajuć.
— Truba šyrokaja?
— Jaje dyjamietr nie šyrejšy za dałoń. Navat kali b u takuju trubu trapiła žyvaja ptuška, jana b tam biłasia, usio roŭna chtości b pačuŭ — naprykład, rabotnik, jaki pakuje. Miortvaja ž ptuška tudy naohuł nijak nie moža patrapić.
— Ale hipatetyčna dostup źnizu da truby jość?
— Tolki ŭ momant nadziavańnia plonki, ale heta siekundnaja sprava. Kab ptuška tudy zalacieła i nichto hetaha nie zaŭvažyŭ — takoha nie moža być. My ŭsio pravieryli, u nas naohuł niama ptušak na vytvorčaści. Pry ŭpakoŭcy zaŭsiody prysutničaje ŭpakoŭščyk, jaki akuratna vykładvaje hatovyja pački ŭ skryniu, kab jany mieli tavarny vyhlad, sočyć, kab nie było drenna zapajanych pakietaŭ. Truba, na jakuju naciahvajecca plonka, znachodzicca ŭ skryni z arhškła prykładna jak na videa, ale ŭ nas abstalavańnie značna sučaśniejšaje za heta.
U kampanii ličać, što chtości sprabuje dyskredytavać ich pradukcyju. Što tyčycca čytački, ź joj da publikacyi hetaha artykuła pradstaŭniki kampanii «Nikicin» užo źviazvalisia.
— Naša kampanija ŭ lubym vypadku vielmi škaduje, što heta adbyłosia z čytačkaj, sa svajho boku, my ŭžo sustrelisia ź joj i prynieśli joj svaje ščyryja prabačeńni. Techničnaj słužbie zahadana jašče raz pierapravieryć navat fizična niemahčymyja varyjanty.
Kamientary