Rasijskija ŚMI praciahvajuć aśviatlać biełaruska-rasijskija adnosiny. «Naša Niva» zrabiła tradycyjny ahlad asnoŭnych publikacyj u rasijskim druku za apošnija dni.
Novaja hazieta: Minsk nie naš. Čamu pravalicca ekstranaja «intehracyja Biełarusi»
Palityčny kansultant biełaruskaha pachodžańnia Vital Šklaroŭ napisaŭ dla «Novaj haziety» niekalki arhumientaŭ, čamu ŭ apieracyi «Minsk naš» u Biełarusi prychilnikaŭ nie budzie.
Aŭtar pryznaje, što suviazi z Rasijaj zamianili Minsku ŭłasnuju ekanomiku i tym samym prafinansavali zamarozku krainy ŭ kancy 80-ch hadoŭ minułaha stahodździa.
Tym nie mienš u adnosinach Maskvy i Minska jość čatyry važnyja supiarečnaści.
Pa-pieršaje, nastalhija pa SSSR u Biełarusi nie nakiravana na Maskvu, ličyć aŭtar.
Tyja ž ludzi, što va Ukrainie ŭsprymajuć Rasiju aporaj zhublenaha savieckaha minułaha, u Biełarusi bačać jaje śvietam dzikaha Uschodu z razhułam «baryh», «aliharchaŭ» i «varjackich hrošaj» na fonie ŭłasnaha askiepka stabilnaści.
Heta značyć tyja ž samyja nastroi, što Kramlu ŭ Krymie i na Danbasie prykmietna dapamahajuć, u Biełarusi stanuć vialikaj pieraškodaj.
«Savieckaja nastalhija pa stabilnaści pracuje na ŭsioj prastory byłoj Biełaruskaj SSR, ale kali ŭ Krymie jana była nakiravana na Rasiju, to ŭ Biełarusi — na siabie i na Alaksandra Ryhoraviča»,
— piša Šklaroŭ.
Druhaja supiarečnaść — sacyjałohija.
Padziei 2014-2015 hadoŭ całkam adnaznačna śviedčać ab tym, što rasijskaje kiraŭnictva znachodziłasia ŭ pałonie šmatlikich iluzij adnosna nastrojaŭ va Ukrainie. Iluzii nie spraŭdzilisia.
Vidavočna, što rasijskaje palityčnaje kiraŭnictva vykarystoŭvaje pry pryniaćci rašeńniaŭ niedakładnyja, niapoŭnyja albo śpiecyjalnym čynam sfalsifikavanyja danyja.
Niama nijakich padstavaŭ mierkavać, što pohlad i acenka ŭnutranych «ekśpiertnych zaklučeńniaŭ» pa Biełarusi budzie inšymi.
Treciaja supiarečnaść — publičny falstart.
Dźvie papiarednija «hieapalityčnyja akcyi» — Hruzija ŭ 2008 hodzie i Ukraina ŭ 2014-m — publična i hučna nie rychtavalisia, zaŭvažaje aŭtar. U pryvatnaści, nijakaha Kryma da lutaha 2014 hoda ŭ rasijskim hramadskim prastory nie isnavała. Tema «viartańnia ŭ rodnuju havań» usurjoz abmiarkoŭvałasia tolki ŭ tych ža kołach «ekśpiertaŭ», jakija siońnia abmiarkoŭvajuć viartańnie Alaski.
«Doŭhaje nahniatańnie publičnaj napružanaści biez realnych krokaŭ niecharakterna dla takoha kštałtu dziejańniaŭ u minułym»,
— piša Šklaroŭ.
Čym daŭžej tema ŭ prastory dyskusii — tym vyšejšy šaniec, što adekvatnyja ekśpierty, a nie tolki vuzkaje koła siabroŭ Rady biaśpieki, zmohuć danieści svoj punkt hledžańnia da Kramla.
Supiarečnaść čaćviortaja — «heta ŭžo pracuje».
Aŭtar pryznaje, što dla Kramla nie budzie składana efiektyŭna skarystacca ŭžo zvykłymi i šmatkroć aprabavanymi instrumientami prapahandy.
Źniešniaja ekspansija va ŭsich papiarednich vypadkach pakazała, što zdolnaja padniać rejtynh, zhładzić lubuju reakcyju na lubyja balučyja reformy, na rost padatkaŭ i źnižeńnie ŭzroŭniu žyćcia ŭ Rasii.
Kommiersant FM: Ciarpieńniu Kramla nastupaje kaniec
Palityčny ahladalnik «Kommiersant FM» Dźmitryj Dryzie analizuje apošnija zajavy Dźmitryja Miadźviedzieva i pahrozy Biełarusi Dźmitryja Kisialova. Žurnalist ličyć, što ciarpieńniu Kramla nastupaje kaniec.
Prykmietna, što hradus napružanaści ŭ adnosinach Maskvy i Minska pavyšajecca, zaŭvažaje aŭtar. Dryzie piša, što Łukašenka pačaŭ «vyvodzić ź siabie».
«Jamu vyrašyli adkazać, pryčym vidavočna z namiokam na toje, što jon moža jašče i surjozna paškadavać pra voś takija niedalnabačnyja pavodziny»,
— piša Dryzie.
Takija supraćstajańni byvali pamiž Biełaruśsiu i Rasijaj raniej, zaŭvažaje aŭtar. Ale ciapier jość pryncypovaje adroźnieńnie — ukazany Kisialovym ukrainski prykład.
«Ci zrazumieŭ Alaksandr Ryhoravič hety prazrysty namiok? Moža być. Prynamsi, raptam nazvaŭ nieparazumieńniem kanflikt na Danbasie i zaklikaŭ jaho chutčej zaviaršać. Uziaŭ udzieł. Da čaho b heta?»
— piša Dryzie.
Moskovskij komsomolec: Łukašenka nie prablema, a kozyr Rasii
«MK» vyśvietliŭ u dvuch «ekśpiertaŭ», čym moža skončycca abvastreńnie ŭ rasijska-biełaruskich adnosinach. Ich mierkavańni razyšlisia.
Andrej Suzdalcaŭ ličyć, što Rasii nie treba źviartać uvahi na pahrozy Łukašenki pasvarycca z Maskvoj.
Jon upeŭnieny, što na majučych adbycca vybarach u Biełarusi pieramoža toj kandydat, na jakoha pastavić Kreml.
«Miascovaja kirujučaja elita padtrymaje tolki taho čałavieka, jaki zmoža vybić z Rasii nieabchodnyja dla padtrymańnia ekanomiki respubliki hrošy. Pakul Łukašenka nie spraŭlajecca z hetaj misijaj, a značyć jaho budučynia tumannaja»,
— skazaŭ Suzdalcaŭ.
A voś Zachad finansavać Biełaruś nie budzie, upeŭnieny kamientatar. Zachad nibyta całkam zadavoleny tym, što Rasija vymušana ciahnuć na sabie jašče adnu dziaržavu.
«Ni ZŠA, ni Jeŭrasajuz nie stanuć uzvalvać na siabie hetuju nošu»,
— skazaŭ Suzdalcaŭ.
A voś Dzianis Dzianisaŭ, dyrektar «Instytuta miratvorčych inicyjatyŭ i kanfliktałohii» ličyć, što Rasii niama čaho bajacca i Łukašenka jaje zadavalniaje.
Jon śćviardžaje, što pieravažnaja bolšaść biełarusaŭ lubiać Rasiju, dy i palityčnaja sistema Biełarusi takaja, što pakul va ŭładzie znachodzicca Łukašenka, jaje nie atrymajecca źmianić takim čynam, kab Zachad moh ličyć Minsk svaim chaŭruśnikam abo instrumientam u baraćbie z Maskvoj.
«Łukašenka — heta nie prablema, a kozyr Rasii. Pakul jon znachodzicca va ŭładzie, niama nijakich sumnievaŭ, što Biełaruś budzie zastavacca sajuźnikam Maskvy. Razam z tym, jak tolki respublika ŭvojdzie ŭ pieryjad tranzitu ŭłady, u Kramla mohuć pačacca ciažkaści»,
— adznačaje «ekśpiert».
Ciapier čytajuć
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1414
Kamientary