«Kruty 1918». Ukraincy źniali mastacki film pra padziei, jakija raniej nie traplali na ekran

7-ha lutaha va ŭkrainski kinaprakat vyjšła miascovaja stužka «Kruty 1918». Heta mastacki film pra boj, jaki adbyŭsia 29 studzienia 1918 hoda kala čyhunačnaj stancyi Kruty (nacisk na pieršy skład: KrUty) u Čarnihaŭskaj vobłaści pamiž balšavikami i armijaj UNR. Ukrainskaje vojska ŭ tym baju składałasia pieravažna z maładych studentaŭ i junkieraŭ sa Studenckaha kurenia.

Pavialičyć

Na niekatory čas hieraičnaja abarona kursantaŭ spyniła nastup balšavikoŭ, ale ŭ vyniku jany ŭsio adno ŭziali Kijeŭ. Ludzi pajšli na abaronu svajoj Ajčyny ad balšavikoŭ, chacia i viedali, što iduć, faktyčna, na śmierć. Napeŭna, tyja padziei možna paraŭnać pa fatalnaści z našym Słuckim zbrojnym čynam. Pamiać pra boj pad Krutami ŭšanoŭvajecca va Ukrainie na dziaržaŭnym uzroŭni.

Film «Kruty 1918» byŭ źniaty ŭ značnaj stupieni za dziaržaŭnyja hrošy. Toje, što va Ukrainie zdymajucca takija patryjatyčnyja filmy za dziaržaŭnyja hrošy — niesumnienny plus. Kłasna, što dziaržava da hetaha darasła. Spadziajusia, kali-niebudź i ŭ Biełarusi dziaržava budzie nie stavić pomniki karovam, a hodna ŭšanoŭvać pamiać antybalšavickich ruchaŭ i dziejačaŭ, jakija zmahalisia za niezaležnuju Biełaruś.

Sam film, kali ščyra, atrymaŭsia siarednim. Pastanoŭka niebłahaja, a voś scenar realna słabavaty. Navat kali vielmi ŭvažliva hladzieć hety film, siužet zdajecca zabłytanym. Nie zusim była zrazumiełaja rola druharadnych hierojaŭ. Ciažka było zrazumieć, chto jakuju funkcyju vykonvaje. A kancoŭka filma nastolki zabłytanaja, što ŭźnikajuć realnyja prablemy z razumieńniem łohiki padziej na ekranie.

Asabliva słabaje miesca filma — kiraŭnik balšavickaha vojska Muraŭjoŭ. Jaho zrabili hałoŭnym hierojem (ci antyhierojem) filma. Muraŭjoŭ pakazany nie revalucyjanieram, pierakananym balšavikom, jon u filmie prosta psichapat i narkaman. Tak, u realnym žyćci jon i byŭ psichapatam i narkamanam. Ale prablema ŭ tym, što režysior u filmie pakazvaje, što dziejańni Muraŭjova źjaŭlajucca vyklučna vynikam jaho patałahičnaj asoby, a nie toj varjackaj złačynnaj ideałohii, jakoj jon prytrymlivaŭsia. Razhladajučy Muraŭjova, režysior pabačyŭ tolki jaho narkatyčnaje tryźnieńnie. Ale zusim nie pakazaŭ toj złačynnaj ideałohii, jakaja ŭ realnaści i kiravała dziejańniami Muraŭjova.

Tamu film atrymaŭsia tak sabie. Ale, paŭtarusia, sam fakt, što ŭkrainskaja dziaržava zdymaje takija filmy — vielizarny krok napierad, i možna tolki paradavacca za heta. Spadziajusia, nastupnyja sproby buduć bolš paśpiachovymi.

• 0
• 0
• 0
• 0
• 0
• 0
• 0
• 0