Baranavicki «Intex-press» dahetul čakaje adkazu z «Biełpošty». «Biełsajuzdruk» admoviŭ vydańniu u raspaŭsiudzie.
Baranavicki «Intex-press» dahetul čakaje adkazu z «Biełpošty». «Biełsajuzdruk» admoviŭ vydańniu u raspaŭsiudzie.
«My pasprabavali ŭśled za «Narodnaj volaj» i «Našaj Nivaj» źviarnucca ŭ arhanizacyi raspaŭsiudu, ale vynik atrymaŭsia nulavy» — paviedamiŭ hałoŭny redaktar baranavickaj haziety «Intex-press» Uładzimir Janukievič. Pavodle jahonych słovaŭ, da viartańnia ŭ šapiki dvuch niezaležnych vydańniaŭ u «Biełsajuzdruku» admaŭlali na toj padstavie, što nie bačać u hetym patreby, a paśla zajavili, što śpis vydańniaŭ, jakija pradaje pradpryjemstva, užo składzieny. U baranavickim adździaleńni «Biełpošty» zajavili, što takoje pytańnie vyrašajecca na respublikanskim ŭzroŭni. Ź Minsku redakcyja najbujniejšaha rehijanalnaha vydańnia čakaje adkazu dahetul.
Hazieta «Intex-press», a taksama inšyja rehijanalnyja vydańni baranavickaha vydavieckaha domu, dachodziać da čytača samastojna. Sistema raspaŭsiudu, raspracavanaja ŭ Baranavičach, u svoj čas dazvoliła vystajać nie adnamu niezaležnamu vydańniu ŭ Biełarusi, u tym liku i ŭ Minsku.
Na siońnia nakład papularnaha ŭ rehijonie vydańnia składaje kala 17 tysiač asobnikaŭ. Čytackaja aŭdytoryja siahaje za 60 tysiač čałaviek.
«Intex-press» była zasnavanaja hrupaj baranavickich pradprymalnikaŭ u 1994 hodzie. Pieršapačatkova zadumvałasia, jak biznes-biuleteń, jaki musiŭ znajomić čytača z raźvićciom biznesu ŭ rehijonie i ŭ krainie. Adnak pieršy numar nakładam u 4000 asobnikaŭ patrapiŭ da čytača ŭ vyhladzie televizijnaha dadatku (tady hazieta naležała miascovaj telekampanii «Intieks»).
Z prychodam u 1996 h. na pasadu hałoŭnaha redaktara Ŭładzimira Janukieviča tydniovik raspačaŭ niaprosty šlach da pieraŭtvareńnia ŭ hramadska-palityčnaje vydańnie.
U 1999 h. byli surjozna pierahledžanyja dyzajn i kancepcyja štotydniovika.
U 2001 h. na bazie redakcyi ŭźnikła TAA «Vydaviecki dom «Intieks-priess». Adno za druhim stali źjaŭlacca rehijanalnyja vydańni vydavieckaha domu — «Hancavicki čas», «Lachavicki čas», «Niaśvižski čas», «Miascovy čas» (Pinsk).
U 2006 h. hazieta razam z šeraham inšych niezaležnych vydańniaŭ była vyklučanaja ź dziaržaŭnaj sistemy raspaŭsiudu.
U 2008 h. z-za niemahčymaści narmalna raspaŭsiudžvacca «Lachavicki čas» i «Miascovy čas» byli vymušanyja prypynić vychad.
Kamientary