Hałoŭny redaktar rasijskaj radyjostancyi «Echo Moskvy» Alaksiej Vieniadziktaŭ patłumačyŭ, što źmienicca z pryznačeńniem Dźmitryja Mieziencava novym pasłom u Biełarusi i jak zamiena pasła źviazanaja z aryštam namieśnika kiraŭnika Rady biaśpieki krainy Andreja Uciuryna.
Pa słovach žurnalista, zadačy pierad Mieziencavym buduć stajać tyja ž, što stajali pierad jaho papiarednikam Michaiłam Babičam.
«Stylistyka źmienicca. Nasamreč, zadačy nie źmianiajucca. Jany vyznačany byli jašče niekalki hadoŭ tamu. Pa eŭfiemizmach Dźmitryja Miadźviedzieva, heta hłybokija intehracyjnyja pracesy… Z palityčnaha punktu hledžańnia, heta zbližeńnie Rasii i Biełarusi ŭ metach pieratvareńnia ŭ adzinuju ekanamičnuju i palityčnuju prastoru».
Aryšt za chabar Andreja Uciuryna, jaki doŭhi čas achoŭvaŭ Alaksandra Łukašenku, u tym liku 7 hadoŭ kiravaŭ jaho asabistaj achovaj, — heta demanstracyja Maskvie.
«Całkam vidavočna mnie, čamu Pucin pryniaŭ rašeńnie adchilić, zabrać pasła Babiča. Andrej Uciuryn byŭ vizavi pasła Babiča. Całkam zakonna, budučy namieśnikam dziaržsakratara Rady biaśpieki, jon mieŭ suviazi z rasijskim pasłom. Mabyć, štości takoje kazali, što było pakładziena na stoł prezidentu Biełarusi, što jon i pradjaviŭ Pucinu… Razumiejem, jakija ŭ jaho mohuć być suviazi, upłyvy. I iduć roznyja čutki — ad zmovy suprać Łukašenki da «pierachopu» na vybarach (vybary ž prezidenta chutka ŭ Biełarusi). Ale ŭ lubym vypadku zrazumieła, što taki demanstratyŭny aryšt Uciuryna — heta ŭ pieršuju čarhu jaho suviazi z RF».
Jon miarkuje, što ŭ spravie Uciuryna suviazi z Rasijaj fihuravać nie buduć.
«Jamu, napeŭna, farmalna hetaha pryšyvać nie buduć, tamu što heta hańba, kali kiraŭnik Rady biaśpieki niešta tam rabiŭ i pieradavaŭ niejkuju infarmacyju. Ci abmiarkoŭvaŭ niejkija płany stratehičnyja i taktyčnyja. Ale heta demanstracyja, biezumoŭna, pierad RF, što my ŭsio viedajem, my vas słuchajem. I voś Babiča vy zabrali, a hetaha my aryštavali. Heta historyja jašče demanstratyŭnaja… Što čałaviek, asabista blizki da prezidenta Łukašenki. Nie ŭratuje, kali vy budziecie z Rasijaj vadzicca. Tak adkryta», — skazaŭ na zakančeńnie žurnalist.
Kamientary