«Niazručnaha» dacenta Plachimoviča zvolnili z BDU. Ciapier jon napisaŭ zajavu ŭ milicyju na kiraŭnictva jurfaka
Z 1 lipienia vykładčyk jurfaka BDU Ivan Plachimovič aficyjna staŭ biespracoŭnym.
«Byŭ vydadzieny zahad rektara — zvolnić u suviazi sa skančeńniem terminu pracoŭnaj damovy. Novuju damovu nie prapanavali zaklučyć, bo mianie nie abrali pa konkursie na pasadu dacenta, jakuju ja raniej zajmaŭ, — patłumačyŭ «Našaj Nivie» Ivan Plachimovič. — Dzie kankretna budu pracavać, jašče nie viedaju. Pakul što varyjantaŭ niama, treba šukać».
Raniej Ivan Plachimovič raspavioŭ «Našaj Nivie» historyju, jak zahadčyk kafiedry Ryhor Vasilevič padrabiŭ viedamaść dziela «błatnoha» studenta. Pa słovach Plachimoviča, Ryhor Vasilevič admysłova raźliŭ kavu na viedamaść z adznakami, a paśla pierapraviŭ patrebnamu studentu admoŭnuju adznaku na stanoŭčuju.
U adkaz u BDU vypuścili zajavu, pryśviečanuju Plachimoviču. Maŭlaŭ, toj parušaŭ pravy studentaŭ, i navučency pastajanna prasili jaho zamianić inšym vykładčykam.
Paśla taho, jak detali historyi pra Ryhora Vasileviča i viedamaść trapili ŭ ŚMI, Ivan Plachimovič pajšoŭ u milicyju.
«Ja padaŭ zajavu ŭ milicyju pra padrobku viedamaści i ab nieabchodnaści raśledavańnia dziejańniaŭ z prykmietami złačynstva, fihurantami jakich źjaŭlajucca maje — užo byłyja — kiraŭniki, — raskazaŭ Plachimovič. — Ciapier idzie pravierka. Pa zakanadaŭstvie termin pravierki 10 dzion, ale milicyjanty paviedamili, što termin, chutčej za ŭsio, budzie praciahnuty, bo supracoŭniki byli zadziejničanyja ŭ mierapryjemstvach, źviazanych ź Jeŭrapiejskimi hulniami».
Ciapier čytajuć
Zialenski ŭ Vilni: Pakul špic Łukašenki maje bolš pravoŭ, čym narod Biełarusi17
Kamientary