«Małady front» byŭ adnoj z samych masavych moładzievych arhanizacyj supracivu. Praź jaho šerahi prajšło niekalki tysiač čałaviek. Faktyčna tolki da maładafrontaŭcaŭ prymianiali represiŭny artykuł 193 KK «Udzieł u niezarehistravanaj arhanizacyi». Usie aktyŭnyja maładafrontaŭcy prachodzili praz sudy i administracyjnyja aryšty, a niekatoryja i praz sutki.
U hetaj publikacyi my zhadajem aktyvistaŭ «MF», pik aktyŭnaści jakich pryjšoŭsia na druhuju pałovu 2000-ch i pieršyja hady 2010-ch.
Źmicier Daškievič: ciaślar
Šmathadovy lidar «Maładoha frontu». Adbyŭ dva turemnyja terminy. U 2006 hodzie aryštavany za «dziejnaść ad imia niezarehistravanaj arhanizacyi», a ŭ 2010 hodzie, za dzień da vybaraŭ, — nibyta za bojku (razam z paplečnikam Eduardam Łobavym). Ahułam adbyŭ u źniavoleńni kala 4 hadoŭ.
Jašče ŭ turmie Źmicier ažaniŭsia z aktyvistkaj «MF» Nastaj Pałažankaj. Pa vyzvaleńni zarehistravaŭ firmu «Cieślary», jakaja robić meblu i inšyja rečy z dreva.
Praciahvaje aktyŭnuju hramadskuju dziejnaść. Naprykład, viadzie zbor podpisaŭ za nadańnie bieł-čyrvona-biełamu ściahu statusu niemateryjalnaj historyka-kulturnaj kaštoŭnaści.
Ale najbolšaja aktyŭnaść Daškieviča prychodzicca na Kurapaty. Źmicier udzielničaje ŭ varcie la restrana «Pajedziem, pajadzim». Staviŭ va ŭročyščy draŭlany kryžy, jakija ŭ vyniku byli śpiłavanyja ŭładami.
Źmicier — aktyŭny pratestancki viernik. Žyvie ŭ Minsku.
Nasta Daškievič (Pałažanka): haduje dzietak i dapamahaje mužu
U «Małady front» pryjšła 14-hadovaj školnicaj. Była adnoj ź lidarak arhanizacyi, kali Daškievič znachodziŭsia ŭ źniavoleńni. U 2012 ažaniłasia sa Źmitrom Daškievičam.
«Ja haduju traich biełaruskamoŭnych dzietak. Dapamahaju «Cieślaram» ź internet-markietynham i kamjunici-mieniedžmientam. Pravodžu raz na hod «Noč rasstralanych paetaŭ» razam z mužam. Minuły hod pracavała rehijanalnym kaardynataram u hramadska-kulturnaj kampanii «Budźma biełarusami». Abjeździła niekalki dziasiatkaŭ haradoŭ Biełarusi razam z daśviedčanym śpikierami i ekśpiertami», — raskazała Nasta Daškievič. Žyvie ŭ Minsku.
Artur Fińkievič: ryełtar
Jašče adzin palitviazień ź liku «Maładoha frontu». U 2006 hodzie asudžany za pieradvybarnyja hrafici «My chočam novaha». Atrymaŭ dva hady «chimii», pakarańnie adbyvaŭ u Mahilovie. Za parušeńni ŭmovaŭ utrymańnia na «chimii» byŭ asudžany da 1,5 hoda kałonii. Ale vyjšaŭ na volu pad ciskam ES i ZŠA paśla razhladu kasacyjnaj skarhi. U 2008 hodzie syšoŭ z «MF» i zasnavaŭ svaju arhanizacyju «Maładaja Biełaruś».
Na siońnia Artur Fińkievič pracuje ryełtaram. Źjaŭlajecca kaardynataram inicyjatyvy «Miesca», jakaja razam ź miascovymi žycharami zajmajecca vyrašeńniem sacyjalnych i ekałahičnych prablem u mikrarajonach Čyžoŭka, Łošyca i Anharskaja. Naprykład, jany zmahalisia za zakryćcio śmietnika «Prudzišča» (sabrali bolš za 2 tysiačy podpisaŭ). Kaža, što palityčnaj dziejnaściu nie zajmajecca. Žyvie ŭ Minsku.
Źmicier Chviedaruk: pastupiŭ vučycca na pastara
U 2008 hodzie Źmicier Chviedaruk pradstaŭlaŭ «Małady front» na sustrečy z prezidentam ZŠA Džoržam Bušam. U pieryjad 2006—2008 byŭ faktyčnym lidaram «MF». Aryštoŭvaŭsia KDB, ale byŭ vyzvaleny praz troje sutak. Aktyŭny ŭdzielnik vuličnych akcyj pratestu. Futbolny zaŭziatar, a taksama pratestancki viernik.
«Pracavaŭ niekalki hadoŭ nastaŭnikam pačatkovych kłasaŭ u pryvatnaj škołcy, ciapier pastupiŭ u Jevanhielska-refarmackuju sieminaryju Ukrainy ŭ Kijeŭ na dzionna-zavočnuju formu. Kali davučusia, to stanu pastaram. Piać razoŭ na hod pa dva tydni ciapier budu byvać u Kijevie. Žanaty. Maju košku pa mianušcy Lizi. Treniruju amatarskuju futbolnuju kamandu «Małanka», jakaja hulaje ŭ AŁF. Siezon skłaŭsia tak sabie, pakul idziom dziaviatymi», — raskazaŭ Źmicier. Žyvie ŭ Minsku.
Aleh Korban: zasnavaŭ arhanizacyju «Alternatyva»
Razam z Nastaj Daškievič, Barysam Hareckim, Źmitrom Chviedarukom i Alaksiejem Janušeŭskim Aleh Korban byŭ pryciahnuty da suda pa artykule 193 KK. U vyniku Korban atrymaŭ štraf 30 bazavych vieličyń.
«Ja praciahvaju ŭdzieł u hramadska-palityčnym žyćci krainy, u 2007—2012 byŭ siabram AHP [Aleh Korban uznačalvaŭ štab Jarasłava Ramančuka pa Minsku — «NN»], uznačalvaŭ moładzievuju arhanizacyju AHP «Maładyja demakraty», ciapier źjaŭlajusia kiraŭnikom hramadskaha abjadnańnia «Alternatyva» (zarehistravana ŭ Łatvii), biaru ŭdzieł u šmatlikich sacyjalnych akcyjach i časam arhanizoŭvaju ich. Aproč hramadskaj dziejnaści, pracuju indyvidualnym pradprymalnikam u śfiery pasłuh. Žyvu ŭ Minsku. Žanaty, haduju dačku Emiliju», — raskazaŭ Aleh.
Paśla Płoščy-2010 Aleh Korban byŭ aryštavany pa padazreńni ŭ arhanizacyi masavych biesparadkaŭ, ale vypuščany ź izalatara 7 studzienia 2011 hoda.
Barys Harecki: namieśnik staršyni BAŽ
U svoj čas byŭ pres-sakratarom «Maładoha frontu», adkazvaŭ za napaŭnieńnie sajta. Niadoŭha pavučyŭsia ŭ Polščy pa prahramie Kalinoŭskaha, paśla čaho viarnuŭsia ŭ Biełaruś.
Pracavaŭ taksistam, paśla čaho syšoŭ u žurnalistyku. Doŭhi čas byŭ karespandentam radyjo «Racyja» ŭ Minsku. Praź niejki čas jaho zaprasili na pasadu pres-sakratara Biełaruskaj asacyjacyi žurnalistaŭ. Na apošnim źjeździe BAŽ byŭ abrany namieśnikam kiraŭnika arhanizacyi. Žyvie ŭ Minsku, žanaty, haduje troch dzietak.
Alaksiej Janušeŭski: byŭ pres-sakratarom «Tarpieda»
Pierad sudom pa spravie «maładafrontaŭcaŭ» za dziejnaść ad imia niezarehistravanaj arhanizacyi źjechaŭ u Čechiju, na sudzie nie prysutničaŭ. Paśla taho, jak jamu byŭ prysudžany štraf, viarnuŭsia nazad u Biełaruś.
«Da zimy na praciahu niekalkich hadoŭ zajmaŭsia futbołam, byŭ dyzajnieram, dyktaram, pres-ataše minskaha «Tarpieda», jaki staŭ pa rejtynhu Słučaka samym biełmoŭnym kłubam krainy. Ciapier zajmajusia internet-markietynham i hrafičnym dyzajnam, čas ad času dapamahaju biełaruskim niekamiercyjnym prajektam, rablu vokładki dla knižak, afišy, rekłamu», — raskazaŭ Alaksiej. Žyvie ŭ Minsku.
Ivan Šyła: zasnavaŭ klininhavuju kampaniju
Jašče budučy niepaŭnaletnim, Ivan pravodziŭ dziasiatki samych roznych akcyj u rodnym Salihorsku razam z bratam Illoj. Jaho nieadnarazova zatrymlivali z vykarystańniem siły. Byŭ asudžany za dziejnaść ad imia niezarehistravanaj arhanizacyi, kali jašče byŭ školnikam. Darečy, pierad samymi vypusknymi ekzamienami Šyłu vyklučyli sa škoły. Hvałtam zabrali ŭ armiju, słužyŭ pad Lepielem. U vojsku jaho adpraŭlali na haŭptvachtu. U vyniku byŭ kamisavany z armii pa pryčynie alerhii.
Vučyŭsia pa prahramie Kalinoŭskaha ŭ Katavicach i Hdańsku, ale viarnuŭsia ŭ Biełaruś. Pracavaŭ esememščykam telekanała «Biełsat», adkul byŭ zvolnieny sa skandałam paśla źmiaščeńnia ŭ fejsbuku fota prezidentaŭ Polščy Dudy i ZŠA Trampa ź iraničnym podpisam. Zasnavalnik klininhavaj kampanii «Čysty kit», biznes viadzie z bratam. Žyvie ŭ Minsku.
Jarasłaŭ Hryščenia: siem hadoŭ u Polščy
Baranavicki aktyvist «MF». Jaho taksama sudzili pa sumnaviadomym artykule 193. U vyniku Hryščeniu dali 30 bazavych vieličyń štrafu. U apošnim słovie chłopiec zaklikaŭ, kab jaho rasstralali.
«Ja siem hadoŭ užo žyvu ŭ Polščy. Ciapier źjaŭlajusia namieśnikam kiraŭnika firmy, jakaja zajmajecca pramysłovym i hramadzianskim budaŭnictvam. Budujem darohi i masty», — kaža Jarasłaŭ. Žyvie ŭ Varšavie.
Mikoła Dziemidzienka: maje firmu ŭ Kijevie
Chłopiec rodam ź Mioraŭ Viciebskaj vobłaści. Byŭ adnym z samych admietnych siabroŭ «MF». Nieadnarazova zatrymlivaŭsia i adbyvaŭ pakarańni za svaju dziejnaść.
«Try hady žyvu ŭ Kijevie, tam stvaryŭ kampaniju pa akazańni jurydyčnych pasłuh», — kaža Mikoła. Jon płanuje viarnucca ŭ Biełaruś u pierśpiektyvie. Žanaty z Alesiaj Ramaniuk, hadujuć dvaich dziaciej.
Pavieł Krasoŭski: pierajechaŭ z Žodzina ŭ Červień
U 2006 hodzie Krasoŭskaha aryštavaŭ KDB, jaho abvinavačvali ŭ teraryźmie. U chutkim časie spravu spynili, Paŭła vyzvalili ź izalatara. Pavieł — lidar žodzinskaha «Maładoha frontu». Udzielničaŭ u haładoŭcy pratestu paśla vyklučeńnia z VNU.
«Žyvu ŭ Červieni, maju svoj biznes pa ramoncie bytavoj techniki», — koratka adkazaŭ Pavieł.
Siaržuk Huminski: Pracuje ŭ śfiery dydžytał
Na aršanskaha aktyvista «MF» Siarhieja Huminskaha zavodzili kryminalnuju spravu za hrafici, ale ŭ vyniku pieraśled spynili. Siaržuk źjechaŭ pa vučobie ŭ Polšču.
«Žyvu ź siamjoj u Varšavie. Hadujem cudoŭnaha syna. Pracuju na adnu karparacyju, dzie zajmajusia dydžytał-markietynham. Pracuju ŭ asnoŭnym z krainami SND u jakaści strateha. Liču, što i ciapier prynošu nievialikuju karyść Biełarusi, bo niasu słova biełaruskaje ŭ śviet dydžytał-markietynhu, a mienavita akazvaju biełaruskamu biznesu padtrymku na biełaruskaj movie. Zrabiŭ svoj markietynhavy słoŭnik, jakim karystajusia ŭ pracy z klijentami. Ciešyć, što ŭ hetym siehmiencie ludzi amal usie — biełaruskija patryjoty niezaležna ad taho, jakoje pradstaŭlajuć rekłamnaje ahienctva», — raskazaŭ pra svajo žyćcio Huminski.
Jaŭhien Skrabutan: pracuje ŭ kansałtynhavym ahienctvie
Jaŭhien sam z Zelvy, vučyŭsia ŭ Hrodnie, ale byŭ vyklučany za svaju palityčnuju dziejnaść z univiersiteta. Pavučyŭsia ŭ Polščy na prahramie Kalinoŭskaha.
«Žyvu ŭ Bieraści, pracuju nad prajektam Białoruś po polsku ŭ fejsbuku — dapamahajem palakam atrymać bolš infy pra Biełaruś: robim propuski pa biaźvizie, arhanizoŭvajem adpačynak i padbirajem biznes-partnioraŭ», — kaža Skrabutan.
Jaŭhien Skrabiec: vodzić ekskursii
Brescki aktyvist «MF». Šmat razoŭ zatrymlivaŭsia, u 2009 Jaŭhien staŭ palitpryzyŭnikom, kali jaho zabrali ŭ vojska.
«Ad niadaŭniaha času žyvu na dva harady — Brest i Biełastok. Pracuju ŭ śfiery turyzmu i žurnalistyki. Vadžu ekskursii pa Bieraści pa-biełarusku, pa-rusku i pa-polsku. Haduju syna, jakomu hod i try miesiacy», — kaža Jaŭhien.
Kasia Vasiljeva (Halickaja): pierakładčyca
Adna ź dziaŭčat, jakija aktyŭna padtrymlivali «MF». Kasia rodam z Babrujska, skončyła BDPU.
«Pracuju pierakładčykam-fryłansieram u śfiery miedyja i pravoŭ čałavieka, supracoŭničaju ź biełaruskimi i ŭkrainskimi arhanizacyjami, haduju dačku, zajmajusia kinałohijaj jak chobi», — apaviała Kasia.
Jana zamužam za jašče adnym aktyvistam «MF» Ramanam Vasiljevym.
Maŭluda Atakułava: ekanamist u IT-kantory
Niekalki razoŭ siadzieła na sutkach, zatrymlivałasia. Za dziejnaść u «MF» jaje chacieli vyklučyć z BDEU. Doŭhi čas pracavała ŭ hruzinskim restaranie. Ciapier — ekanamist u adnoj IT-kampanii. Žyvie ŭ Minsku.
Andruś Cianiuta: pradaje cukrovuju vatu
Niejki čas homielski maładafrontaviec Andruś Cianiuta navat uznačalvaŭ arhanizacyju. Ciapier jon žyvie ŭ Polščy, u prymorskim horadzie Kałabžeh, vučycca na prahramie Kalinoŭskaha.
«Vučusia na mižnarodnych adnosinach, letam pracujem, pradajom cukrovuju vatu na plažy», — kaža Andruś.
Alona Vałavik (Makarevič): čakaje muža z turmy
U druhoj pałovie 2000-ch Alona była zaŭvažnaja na ŭsich akcyjach pratestu. Alona zamužam za antyfašystam Illoj Vałavikom, jaki ciapier adbyvaje 10-hadovaje źniavoleńnie za chulihanstva. Mnohija bačać u hetaj spravie palityčny padtekst.
«Była try hady ŭ dekrecie, ciapier u pošukach pracy», — kaža jana. Žyvie ŭ Minsku.
Kirył Atamančyk: turystyčny biznes
Kali suprać Kiryła, jaki ŭznačalvaŭ «MF» u Žłobinie, zaviali kryminalnuju spravu, jon źjechaŭ u Vilniu, vučyŭsia ŭ EHU. Pa-raniejšamu praciahvaje žyć u litoŭskaj stalicy.
«Paśpiachova skončyŭ EHU. Atrymaŭ stupień mahistra kulturnaj spadčyny. Maju ŭłasny biznes u halinie turyzmu. Źjaŭlajusia aktyŭnym udzielnikam biełaruskaha hramadskaha žyćcia ŭ Vilni. Staŭ adnym ź inicyjataraŭ Pieršaj hramadskaj stypiendyi dla aktyŭnych biełaruskich studentaŭ, jakaja atrymała nazvu «Stypiendyja imia A. Smoliča», — kaža Kirył.
Amierykancy dabilisia vyzvaleńnia Juryja Ziankoviča. Jon byŭ prysudžany da 11 hadoŭ źniavoleńnia18
Kamientary