U Minsku adkryli bar «Pjanaja višnia». Va Ukrainie aburajucca, što heta płahijat. Raźbirajemsia
Na hetym tydni na vulicy Zybickaj u Minsku zapracavaŭ bar «Pjanaja višnia». Ideja jaho prostaja: u bary pradajecca ŭsiaho tolki adzin pradukt, a mienavita — višniovaja nastojka.
Niama zakusak, niama miesca dla pasiadziełak. Zachodziš u bar, płaciš hrošy — tabie nalivajuć nastojku ŭ pryhožy kielich (kali pakidaješ 5 rubloŭ u zakład; kali nie, to ŭ płastykoŭku), vypivaješ i idzieš tusavacca dalej.
Niešta znajomaje? Całkam sabie. Mnohija biełarusy mahli bačyć padobnyja mini-bary ŭ niedalokim Lvovie. Ukrainskaja «Pjanaja višnia» vielmi papularnaja ŭ turystaŭ, niachaj tam i nalivajuć nie samy vykštałcony napoj, ale atmaśfiera i dastupnyja ceny spryjajuć tamu, što va ŭstanovie zaŭsiody čerhi.
Va ŭkrainskich barach taksama nie pasiadziš, jany raźličanyja na chutkaje spažyvańnie.
Padabienstvy vidavočnyja. Chiba što
na łahatypie biełaruskaj «Pjanaj višni» abskubany pievień — jaho, darečy, namalavaŭ viadomy dyzajnier Uładzimir Ceśler, a na ŭkrainskaj — paŭhołaja panienka, jakaja chavaje hrudzi za dźviuma ahramadnymi višniami.
Adznačym taksama, što interjer «Pjanaj višni» na Zybickaj aformleny vyklučna pa-biełarusku. Zasnavalniki ŭ intervju kazali, što zacikaŭlenyja ŭ pryniaćci na pracu biełmoŭnych supracoŭnikaŭ, jakija mohuć spakojna padtrymlivać razmovu pa-nasku. Dla tusovačnaj Zybickaj ceny ŭ «Višni» całkam sabie demakratyčnyja.
Tolki adhrymieli pieršyja recenzii i vodhuki na novuju ŭstanovu, jak pryjšła reakcyja z Ukrainy.
Adzin z zasnavalnikaŭ ukrainskaj «Pjanaj višni» Andrej Chudo napisaŭ na svajoj staroncy ŭ fejsbuku:
«Čarhovy płahijat našych prajektaŭ. Na hety raz adznačylisia «braty-biełarusy» ź Minska. Da mianie źviartalisia niekalki razoŭ pra kuplu franšyzy našaha bara «Pjanaja višnia». My admaŭlalisia praz palityčnyja pryčyny. Vieru, što kaliści Biełaruś źmienicca i my zmožam pakazać, što takoje biznes u styli fank pa-lvoŭsku».
Post spadara Chudo vyklikaŭ dastatkova žyvoje abmierkavańnie ŭ fejsbuku. Kab źniać niekatoryja pytańni, my źviarnulisia da zasnavalnika minskaj «Pjanaj višni» Siarhieja Klancova.
«Nijakaha płahijatu niama. U nas aryhinalnaja receptura, nastojka vyrablajecca ŭ vioscy Mańkavičy Stolinskaha rajona. Kaliści tam Radziviłami byŭ zasnavany brovar. Razumiejecie, sama fraza «pjanaja višnia» isnavała ŭ nas na Paleśsi spradvieku. Tam kažuć «pjana vyšnia» — z paleskim akcentam. U Biełarusi takoha tavarnaha znaka nie isnavała.
I, naprykład, u Rasii tavarny znak «Pjanaja višnia» byŭ zarehistravany značna raniej, čym va Ukrainie. My ŭsio rabili zhodna ź biełaruskim zakanadaŭstvam», — tłumačyć Siarhiej Klancoŭ.
Biznesmien kaža, što jany sapraŭdy źviartalisia va Ukrainu nakont nabyćcia franšyzy «Pjanaja višnia», ale sutyknulisia z admovaj. «Nakont palityčnych pryčynaŭ ničoha nie viedaju, ale nam skazali, što ź Biełaruśsiu jany nie pracujuć: małaja mahutnaść»,— raskazvaje spadar Klancoŭ.
Ci jurydyčna karektnaje vykarystańnie brenda «Pjanaja višnia» ŭ Minsku? Pra heta my spytali advakatku Maryju Kolesavu-Hudzilinu. «Kali tavarny znak «Pjanaja višnia» zarehistravany va Ukrainie, to staić pytańnie, ci nabyvali jany abaronu pravoŭ na terytoryi Biełarusi. Kali tak, to jany mohuć zapatrabavać spynieńnia vykarystańnia najmieńnia «Pjanaja višnia» ŭ Biełarusi albo atrymlivać hrošy za jaho vykarystańnie.
Kali navat ukraincy nie majuć tavarnaha znaka z pravam pryjarytetu ŭ Biełarusi, to jany mohuć atrymać jaho ciapier. U takoj situacyi ŭkrainski bok całkam moža atrymlivać prybytak za vykarystańnie najmieńnia «Pjanaja višnia», — tłumačyć spadarynia Kolesava-Hudzilina.
U lubym vypadku historyja z «Pjanaj višniaj» moža mieć praciah. I nie fakt, što ŭkraincy vyrašać prosta źmirycca ź isnavańniem u Minsku bara z takoj ža nazvaj i kancepcyjaj, jak u Lvovie.
Ciapier čytajuć
Kiraŭnik Lidy zaklikaŭ siłavikoŭ nie spyniać palityčnych represij24
Kamientary