Jeparchija pra novuju carkvu ŭ Salihorsku: U Słucku piać chramaŭ, a ŭ Salihorsku tolki adzin
Słuckaja jeparchija adkazała «Našaj Nivie», čamu ŭ Salihorsku vyrašana ŭźvieści novuju carkvu. Pa źviestkach BPC, u horadzie na 106 tysiač čałaviek isnuje 5 pravasłaŭnych relihijnych hramad. Ale tolki adzin chram dzieje — kafiedralny sabor. Astatnija — na stadyi budaŭnictva. U tym ža Maładziečnie i Słucku — pa 5 dziejnych cerkvaŭ, u Vilejcy — 3.
«Pavodle vynikaŭ pasiadžeńnia Rady Biełaruskaha sajuza architektaraŭ i Rady hałoŭnych architektaraŭ abłaściej, haradoŭ i rajonaŭ Biełarusi, jakoje adbyłosia ŭ Salihorsku 15 červienia 2017 hoda, była vyniesiena rekamiendacyja źviarnuć asablivuju ŭvahu na mastacka-estetyčnaje ŭsprymańnie horada i, u pryvatnaści, na budoŭlu architekturnych abjektaŭ, paraŭnalnych pa charastvie i admietnaści z kafiedralnym saboram», — kažuć u jeparchii.
Vyłučyć ziamielny ŭčastak pad chram śviaciciela Mikałaja Cudatvorca prychod prasiŭ jašče čatyry hady tamu. Podpisy pad zvarotam u rajvykankam pakinuli 5 tysiač salihorcaŭ.
«Płanujecca, što chram śviaciciela Mikałaja Cudatvorca budzie słužyć miescam malitvy dla žycharoŭ niekalkich novych mikrarajonaŭ Salihorska. Jaho pabudova zakryvaje pytańnie ab dalejšym zasnavańni pravasłaŭnych prychodaŭ u miežach horada, — adznačaje Słuckaja jeparchija. — Dahetul u Salihorsku niama pomnika Pieramohi ŭ Vialikaj Ajčynnaj vajnie. Uźviadzieńnie chrama zaklikana zapoŭnić hety prabieł. Na jaho terytoryi budzie stvorany miemaryjał 75-hodździa Pieramohi, u padmurak jakoha płanujecca zakłaści kapsuły ź ziamloj sa spalenych nacysckimi akupantami viosak Salihorščyny. Kancepcyja chrama praduhledžvaje ŭviekaviečańnie pamiaci narodnych hierojaŭ, siarod jakich — zažyva spaleny karnikami ŭ carkvie śviatar Iaan Łojka ź vioski Chorastava, partyzanski kamandzir Vasil Korž, braty Ivan i Michaił Cuby».
U jeparchii dadajuć, što prajekt budoŭli nie praduhledžvaje vysiakańnia drevaŭ.
«Učastak pad chram znachodzicca na ŭskrajku reštki lasnoha masivu, jakuju niekarektna nazyvać parkavaj zonaj».
Čytajcie taksama: U parku na ŭskrajku Salihorska źbirajucca budavać chram. Haradžanie suprać: i tak šmat cerkvaŭ!
Ciapier čytajuć
Pamior 50-hadovy śpiecnazaviec Bućko. Jon byŭ udzielnikam vykradańnia i zabojstva Zacharanki i Hančara28
Kamientary