U Rasii naličyli piać 17-hadovych, kožnaja ź jakich užo naradziła piać dziaciej
Čatyry 12-hadovyja dziaŭčynki stali mamami. 32 niemaŭlat naradzili 13-hadovyja, 190 pieršyncaŭ źjavilisia na śviet u 14-hadovych, a ŭ čatyroch ich adnahodak ŭžo pa dva dziciaci, dadzienyja pryvodzić Rasstat.
Pa słovach dyrektara Instytuta demahrafii Vyšejšaj škoły ekanomiki Anatola Višnieŭskaha, u šerahu rehijonaŭ Rasii takoje stanovišča spraŭ ličycca narmalnym.
«Treba, viadoma, viedać, dzie heta adbyvajecca, Rasija — kraina vialikaja, kali heta dzie-niebudź na Paŭnočnym Kaŭkazie, što vy možacie zrabić. Kali dziaŭčynka zaciažaryła, to jana pavinna naradzić», — cytuje jaho słovy ahienctva «Prajm».
Višnieŭski nahadaŭ, što dzie-nidzie ŭ Rasii dziaŭčynku vydajuć zamuž u vielmi rańnim uzroście. Byvajuć, viadoma, i kryminalnyja vypadki, ale jany redkija. Ličycca, što repraduktyŭny ŭzrost pačynajecca z 15 hadoŭ.
«Usio zaležyć ad taho, u jakim asiarodździ žyvie, jak baćki staviacca. Vy nie možacie zabaranić, dy i nie treba zabaraniać naradzić. Nielha taksama zabaranić zrabić abort — heta pytańnie vybaru ŭ siamji i samoj dziaŭčynki», — padkreśliŭ Višnieŭski.
U ciapierašni čas kryminalnaja adkaznaść u Rasii nadychodzić za pałavy akt z čałaviekam, jaki nie dasiahnuŭ 16 hadoŭ.
Kamientary