Hrodzienka pakazała raspakoŭku z kramy: hrošy addała, a ježy amal niama
Žycharka Hrodna apublikavała videa z raspakoŭkaj praduktaŭ i pakazała ček: 51 rubiel. Pry hetym, pavodle jaje słoŭ, «ničoha istotnaha nie nabyta», piša BGmedia.
Jak raspaviała žančyna, jana zavitała ŭ kramu «Hrodnachlebpram».
U miašku byli: paŭbatona, hłazuravanyja abaranki, małako, zavarnoje piečyva, skumbryja, masła, aŭsianyja šmatki (hierkules), śmietankovy syr i suchary. Kab paźbiehnuć abvinavačvańniaŭ u chłuśni, aŭtarka adrazu dałučyła fota čeka, adnak heta nie spyniła sprečak.
U kamientarach ludzi ŭ pieršuju čarhu pačali padličvać vydatki. Mnohija adznačyli, što pałova sumy pajšła na masła i rybu.
«Masła i skumbryja — heta ŭžo 30 rubloŭ».
«Skumbryja ciapier amal dalikates».
Častka kamientataraŭ pryznajecca: chadzić u kramu stała strašna — zapłaciŭ hrošy, a pakiet amal pusty. «100 rubloŭ — i ŭsiaho adzin pakiet praduktaŭ», «51 rubiel — heta ciapier uvohule ni pra što», — dzielacca karystalniki svaim dośviedam.
Znajšlisia i tyja, chto raskrytykavaŭ samu pakupku. Maŭlaŭ, možna było abyścisia biez ryby, masła i łasunkaŭ.
«Šmat mučnoha i zališniaha».
«Vy sami vybirali košyk, u čym pretenzii?»
Ale im tut ža paryravali: čamu čałaviek pavinien admaŭlać sabie ŭ zvyčajnych praduktach? I ź jakich časoŭ masła, syr i ryba stali raskošaj?
Asabliva emacyjnymi byli kamientary padžyłych ludziej. Piensii 700—800 rubloŭ, pavodle ich słoŭ, paśla apłaty kamunalnych pasłuh i nabyćcia lekaŭ zastajucca hrošy tolki na samy minimum.
«Chutka boršč budziem jeści bieź śmiatany».
«Viasnoj i hetaha nie budzie».
Navat pradaŭcy paćviardžajuć: ceny rastuć, i heta vidać štodzień. «Ja vieru vam. Heta žach, a nie ceny», — napisała supracoŭnica adnoj z kram Hrodna.
Jak vyśvietliłasia, žančyna ŭžo nie pieršy raz zdymaje padobnyja roliki. Raniej jana pakazvała pakupku ŭ kramie miasakambinata na 11 rubloŭ — sucharyki z razynkami, kiefir, klatčatka i miakki tvaroh.
A pachod u «Śviatłafor» abyšoŭsia joj na 85 rubloŭ — dva vidy syru, manha, piečyva, kiłahram kavy, spahieci i myła. I znoŭ — «ničoha nie kupili».
Kožny taki rolik vyklikaje adno i toje ž pytańnie: jak žyć pry takich cenach? Miarkujučy z kamientaroŭ, adkazu na jaho ŭ ludziej niama. Zatoje jość ahulnaje adčuvańnie: pradukty daražejuć, a dachody za imi nie paśpiavajuć.
Ciapier čytajuć
Advakat Dźmitryj Lepretar raskazaŭ pra biełyja plamy ŭ spravie ab terakcie ŭ mietro1
Kamientary
A ŭ hetaj chacie niama čaho daci! Płuski smažać, pirahi mažuć! Karostu truć, chleb piakuć!