Ukrainskija maraki sabrali hrošy ŭ padtrymku asudžanaha na 4 hady rasijskaha aktyvista
Maraki, jakija byli vyzvalenyja ŭ ramkach abmienu źniavolenymi pamiž Ukrainaj i Rasijaj, sabrali hrošy dla rasijskaha aktyvista Kanstancina Kotava. Pra heta paviedamiŭ advakat Mikałaj Połazaŭ u fejsbuku.
Raniej Kotaŭ nieadnarazova vystupaŭ u padtrymku ŭkrainskich marakoŭ. Połazaŭ nahadaŭ, što Kotaŭ «prychodziŭ da marakoŭ na sudy, stajaŭ u pikietach u padtrymku vajennapałonnych i palitviaźniaŭ ukraincaŭ i krymskich tataraŭ».
Advakat nazvaŭ artykuł 212.1 KK RF, pa jakim byŭ zatrymany i asudžany Kotaŭ, «represiŭnym, prydumanym rasijskimi ŭładami dla tych, chto sprabuje realizavać kanstytucyjnaje prava na svabodu schodaŭ. Dla tych, chto mirnymi sposabami vystupaje suprać niespraviadlivaści ŭłady».
«Z chutkaściu stalinskich trojek, litaralna za tydzień, Kanstancin Kotaŭ byŭ prysudžany da 4 hadoŭ łahieraŭ. Prosta za toje, što nie pramaŭčaŭ. Kali ŭkrainskich marakoŭ vyzvalili, jany daviedalisia, što vałanciora Kościu Kotava pasadzili. I jany, jak i raniej sam Kościa, nie zmahli pramaŭčać i zastacca ŭ baku», — napisaŭ Połazaŭ. Pavodle jaho słoŭ, maraki sabrali 12 400 ukrainskich hryŭniaŭ i 25 850 rasijskich rubloŭ (u sumie kala 2000 biełaruskich).
Aktyvist byŭ zatrymany 12 žniŭnia, rasśledavańnie spravy zaniało ŭsiaho try dni, a na aznajamleńnie z materyjałami Kotavu i jaho abaronie dali 72 hadziny. U vyniku sud pryznaŭ jaho vinavatym u nieadnarazovym parušeńni praviłaŭ praviadzieńnia mitynhaŭ, prysudziŭšy da čatyroch hadoŭ pazbaŭleńnia voli. Svaju vinu aktyvist nie pryznaŭ, zajaviŭšy, što sudziać nie jaho, «a prava na svabodu słova i svabodu schodaŭ». «Niama niezaležnych partyjaŭ, niama sumlennych vybaraŭ, zastajecca adno vyjście — iści na vulicu i tam prakryčać svaje patrabavańni. Ale navat heta nie dazvalajuć», — skazaŭ Kotaŭ ŭ sudzie.
Ciapier čytajuć
Čym ciapier žyvie Ksienija Vołkava z «Apošniaha hieroja»? Čverć stahodździa tamu hetaja biełaruska trapiła na trapičny vostraŭ2
Kamientary