Vybary va Uźbiekistanie: mandaty padzialili piać partyj
Va Uźbiekistanie 22 śniežnia prajšli parłamienckija vybary.
Śpiecyfičnaja sistema skłałasia va Uźbiekistanie. Tam zarehistravana piać palityčnych partyj, jany dzielać miescy ŭ parłamiencie, ale ŭsie jany padtrymlivajuć isnuju sistemu.
Prezidenta Šaŭkata Mirzijojeva vyłučała Libieralna-demakratyčnaja partyja. Jana maje najbolš deputataŭ u parłamiencie — 43 mandaty atrymała hetym razam u pieršym tury.
Na druhim miescy pa kolkaści deputataŭ — nacyjanalisty z partyi «Nacyjanalnaje adradžeńnie», u ich paśla pieršaha tura — 35 mandataŭ. Razam ź libierał-demakratami jany ŭtvarajuć uradavuju bolšaść.
Astatnija partyi aficyjna — u apazicyi, ale ŭ realnaści nie asprečvajuć sistemy.
Na trecim miescy pa kolkaści deputataŭ (21) hetym razam apynułasia Sacyjał-demakratyčnaja partyja «Spraviadlivaść». A na čaćviortaje miesca (18 deputataŭ) pieramiaściłasia Narodna-demakratyčnaja partyja, pierajemnica Kampartyi. Cikava, što papiarednik Mirzijojeva, Isłam Karymaŭ, u 90-ja vyłučaŭsia ad narodnych demakrataŭ, a ŭ 2000-ja — užo ad libierał-demakrataŭ. I ŭ pieršym, i ŭ druhim vypadku jon ščaśliva źbiraŭ svaje 90% hałasoŭ.
Na piatym miescy — Ekałahičnaja partyja. Na minułych vybarach ekałahičny ruch atrymaŭ 15 miescaŭ na biezkankurentnaj asnovie, hetym razam jon užo ŭdzielničaŭ u «vybarčym zmahańni» i «pravioŭ» 11 vyłučencaŭ.
Jašče 22 mandaty raźmiarkujuć u druhim tury.
U apošnija hady Mirzijojeŭ pravioŭ šerah rynkavych reformaŭ, zharnuŭ palityčnyja represii, ale raźmierkavańnie miescaŭ u parłamiencie, jak bačym, ad hetaha nie źmianiłasia.
Kamientary