Kałumnist The Wall Street Journal, śpiecyjalist pa mižnarodnych adnosinach Uołtar Raseł Mid u svajoj kałoncy piša pra toje, što abarona relihijnaj svabody (u pieršuju čarhu ŭ adnosinach da chryścijan) moža stać hałoŭnym elemientam amierykanskaj palityki ŭ halinie praŭ čałavieka.
Aŭtar źviartaje ŭvahu na sumny fakt: chryścijanie pa ŭsim śviecie sutykajucca ź biesprecedentnym uzroŭniem dyskryminacyi, hvałtu i cisku. Staražytnyja chryścijanskija narody Blizkaha Uschodu apynulisia na miažy źniknieńnia. Chryścijanie ŭ krainach Afryki sutykajucca z hvałtam z boku bajevikoŭ «Boka charam». U Pakistanie nivodzin chryścijanin nie zastrachavany ad iłžyvych abvinavačvańniaŭ ŭ bluźnierstvie. Induisckija ekstremisty ŭ Indyi rehularna napadajuć na cerkvy. U Indaniezii radykalnyja isłamisty sprabujuć źniščyć tradycyjna mirnyja adnosiny pamiž roznymi relihijnymi hrupami. Najbolš tryvožnyja padziei adbyvajucca ŭ Kitai, dzie chryścijanskaje nasielnictva adčuvaje rehularny cisk. Kamunistyčnyja kiraŭniki Kitaja dobra viedajuć, što chryścijanie ŭznačalvajuć demakratyčnyja ruchi ŭ mnohich krainach, u tym liku ŭ Hankonhu.
Dziaržsakratar ZŠA Majk Pampiea choča zrabić svabodu vieravyznańnia centralnym elemientam amierykanskaj palityki ŭ halinie praŭ čałavieka, piša kałumnist The Wall Street Journal. Sprava tut nie tolki ŭ tym, što Tramp šukaje padtrymku siarod relihijnych vybarščykaŭ. Dziaržsakratar ZŠA adznačaje, što relihijnaja svaboda źjaŭlajecca klučavoj umovaj praćvitańnia i biaśpieki, i mienavita jaje varta zrabić klučavym aśpiektam u pytańniach abarony praŭ čałavieka. Mienavita svaboda sumleńnia i vieravyznańnia źjaŭlajecca asnoŭnym pravam, ź jakoha vyciakajuć usie astatnija.
Svaboda vieravyznańnia — heta nie tolki samaje asnoŭnaje prava čałavieka, piša Uołtar Raseł Mid. Abarona relihijnaj svabody taksama moža stać dobraj stratehijaj dla amierykanskich pravaabaroncaŭ. Paśla šmatlikich niaŭdač za apošnija dziesiacihodździ amierykanskija pravaabaroncy stracili svoj davier siarod zvyčajnych amierykancaŭ. A abarona relihijnaj svabody daje pravaabarončaj supolnaści najlepšuju mahčymaść viarnuć padtrymku nasielnictva, adnačasova supraćstojačy žachlivamu złu.
Kamientary