Apazicyja prydumała składanuju schiemu abrańnia adzinaha kandydata

Piaciora lidaraŭ apazicyjnych palityčnych partyj abvieścili pra praceduru abrańnia adzinaha kandydata na prezidenckija vybary-2020. Prostaj jaje zusim nie nazavieš.

Prezientacyja adbyvałasia ŭ hateli Crown Plaza. Palityki abrali kruhłuju zału z salarnaj simvolikaj na stoli, padzielenaj na dvanaccać siektaraŭ pa znakach zadyjaku. Apazicyjaniery nie siadzieli za stałom, a stali pierad šaściu bieł-čyrvona-biełymi ściahami.

Pavialičyć

Apytanka

Vystupali pa čarzie Juraś Hubarevič (Ruch «Za Svabodu»), Vital Rymašeŭski (BCHD), Mikałaj Kazłoŭ (AHP), Ihar Barysaŭ (BSDP), Ryhor Kastusioŭ (Partyja BNF). Lidar partyi «Zialonyja» Dźmitryj Kučuk taksama prysutničaŭ na mierapryjemstvie, choć jaho arhanizacyja nie dałučyłasia da pracedury.

Mohuć dałučycca da pracedury i inšyja partyi i arhanizacyi. Naprykład, BSDH Siarhieja Čeračania, ale pakul takoha žadańnia jon nie vyjaŭlaŭ.

Jašče pierad pačatkam na mierapryjemstva pryjšli pradstaŭniki kampanii «Śviežy viecier». Michaś Jančuk u majcy «Kastusioŭ abo śmierć» trymaŭ u rukach maryjanietku-błazna. Hetkim čynam jon demanstravaŭ svajo staŭleńnie da vyłučeńnia kandydataŭ na vybary. «My ŭžo dziesiać hadoŭ topčamsia na adnym i tym ža miescy», — kazaŭ Jančuk.

Pavialičyć

«Heta šou-biznes», — paśmiajaŭsia Pavieł Sieviaryniec. Sam jon siadzieŭ u zale, a nie byŭ siarod vystupoŭcaŭ.

Karespandent «NN» atrymaŭ uščuvańnie ad pres-sakratara AHP Hanny Krasulinaj za zahałovak «Hubarevič ci Sieviaryniec?».

Što tyčycca pracedury prajmieryz, to jana atrymałasia składanaj. Pasprabujem rastłumačyć praściej.

Pierad pačatkam prajmieryz majecca 100 bałaŭ na ŭsich kandydataŭ. Ad samaha pačatku pa 2 bały atrymlivaje kožnaja partyja.

Nastupnyja 30 bałaŭ buduć razyhranyja padčas internet-hałasavańnia. Budzie stvorany admysłovy sajt, na jakim za kandydataŭ možna budzie prahałasavać.

Jašče 30 bałaŭ buduć razyhranyja padčas pajezdak pa rehijonach (kandydaty majuć namier abjeździć kala 80 haradoŭ).

I narešcie apošnija tryccać bałaŭ razyjducca padčas Kanhresu demakratyčnych siłaŭ. Kožnaja partyja budzie mieć tam pa 100 pradstaŭnikoŭ, a asacyjavanyja siabry — pa 25.

Čytajcie taksama: Kab abrać adzinaha kandydata, apazicyja nabyła anłajn-płatformu češskaha miljardera. Jak jana pracuje?

U vyniku toj, chto nabiare najbolš hałasoŭ, i budzie adzinym ad apazicyi. Pracedura skončycca ŭ druhoj pałovie maja.

Adnak lidar Partyi BNF Ryhor Kastusioŭ prapanavaŭ vyznačycca z adzinym užo siońnia. Jon prapanavaŭ kandydatam Paŭła Sieviarynca. Maŭlaŭ, Partyja BNF hatovaja achviaravać dziela Paŭła svaimi intaresami. Kalehi pa cechu nie advažylisia padtrymać prapanovu Ryhora Andrejeviča.

Da kandydata vyłučyli šeść patrabavańniaŭ. Treba vystupać za:

1. niezaležnaść i suprać dyktatury;
2. abaronu sacyjalnych i ekanamičnych pravoŭ biełarusaŭ;
3. vychad z ADKB i sajuznaj dziaržavy;
4. raźvićcio biełaruskaj movy i kultury;
5. dobrasusiedskija adnosiny ź Jeŭrasajuzam, Rasijaj i ZŠA;
6. niedapuščalnaść źniešniaha ŭmiašalnictva ŭ spravy Biełarusi.

Cikava, što da adzinaha budzie jašče patrabavańnie nie kazać ničoha, što supiarečyć tradycyjnym siamiejnym kaštoŭnaściam. Mabyć, chryścijanskija demakraty prapchnuli hety punkt.

Zajaŭki pa kandydatach buduć prymacca da viečara 16 lutaha. Ad kandydata budzie patrebna 200 podpisaŭ u padtrymku, a taksama 500 jeŭra na arhanizacyjnyja vydatki. 4 sakavika buduć viadomyja ŭsie proźviščy kandydataŭ.

Pavialičyć

• 0
• 0
• 0
• 0
• 0
• 0
• 0
• 0