Zvarot Ahnieški Ramašeŭskaj‑Huzy da supracoŭnikaŭ i pracaŭnikoŭ kanału «Biełsat».
Darahija kalehi!
Paśla amal troch hadoŭ ciažkoj pracy my razam zdoleli ździejśnić toje, što šmat kamu zdavałasia niemahčymym. My stvaryli sapraŭdny televizijny kanał, jaki štodnia tranśluje svaje prahramy. My sabrali vialikaje koła talenavitych supracoŭnikaŭ. Nam udałosia ažyvić nadzieju tvorcaŭ na toje, što vyniki ichnaje pracy trapiać da šyrokaj aŭdytoryi i stanucca impulsam da hramadskaj dyskusii, da źmienaŭ u Biełarusi.
Našaja praca słužyć spravie abmienu svabodnaj infarmacyjaj, a taksama pašyreńniu viedaŭ u halinie kultury i historyi. My słužym toj idei, jakaja lažała ŭ padmurku stvareńnia «Biełsatu», — idei nabližeńnia Biełarusi da Jeŭropy, histaryčnaju častkaju jakoj jana była i jość.
Kalehi, ja sapraŭdy vielmi hanarusia Vašaju pracaju i dasiahnieńniami. Ja vielmi chacieła b, kab, niahledziačy na majo adchileńnie, hetaja praca nie pierapyniłasia, a jaje vyniki nie zmarnavalisia. Sardečna dziakuju Vam za vykazanuju salidarnaść. Dziakuju za padtrymańnie Daradčaj radzie «Biełsatu», supraca ź jakoju, choć i była karotkaju, abiacała stać nadzvyčaj pierśpiektyŭnaju. Dziakuju Paŭłu Mažejku za žest salidarnaści.
Niezaležna ad situacyi na Polskim dziaržaŭnym telebačańni, ja nie płanuju pakidać prajekt «Biełsat», bo jašče nie čas. Naadvarot, ja płanuju jašče intensiŭniej pracavać dziela taho, kab zrabić hety prajekt sapraŭdy mižnarodnym, a taksama zaŭsiody budu słužyć paradaju i dapamohaju dziela palapšeńnia jakaści našych prahramaŭ i šyrokaj rekłamy kanału ŭ Biełarusi.
Spadziajusia, «Biełsat» nie stracić nivodnaha sa svaich viadoŭcaŭ i pracaŭnikoŭ, i ad usiaho serca prašu Vas ab hetym. Varta pamiatać — asabliva ŭ ciažkija časy — maksimu, jakaja stałasia devizam polskich prafsajuzaŭ «Salidarnaść»: «Salidarnaść niemahčyma ani padzialić, ani źniščyć».
Sardečna paciskaju Vašyja ruki i nie raźvitvajusia.
Kamientary