«Pandemija zakryła miežy, ale abjadnoŭvaje ludziej». Polšča pieradała dapamohu biełaruskim miedykam
Šeść hruzavikoŭ humanitarnaj dapamohi biełaruskim miedykam pryjechali z Polščy 24 krasavika. Heta padarunak ad polskaha ŭrada biełaruskamu. Častka hruzu zastałasia ŭ Hrodnie, rešta pajedzie ŭ Minsk i Voranava, piša Radyjo Svaboda.
Jak raskazaŭ hienieralny konsuł Polščy ŭ Hrodnie Jarasłaŭ Ksionžek, Biełaruś paprasiła ab dapamozie roznyja krainy. Polšča adhuknułasia adnoj ź pieršych.
Humanitarnuju dapamohu zabiaśpiečyła Ministerstva zamiežnych spraŭ Polščy, polski fond mižnarodnaj dapamohi «Salidarnaść» i pažarnaja słužba Polščy.
«My susiedzi. My vielmi chočam być dobrymi susiedziami. Kali dobra, tady dobra. Ale kali prychodziać ciažkaści, tady mienavita praviarajecca dobraje susiedstva. Ja maju nadzieju, što prykład dapamohi Polščy — heta paćvierdžańnie dobraha susiedstva», — skazaŭ Jarasłaŭ Ksionžek.
Kapitan dziaržaŭnaj pažarnaj słužby Polščy Jakub Siček paviedamiŭ, što ŭ Biełaruś pryvieźli ahułam kala 80 tysiač litraŭ dezynfiekcyjnych srodkaŭ, 100 tysiač masak i 1000 adzinak lekaŭ, ź ich 7,5 tysiačy litraŭ dezynfiekcyjnych srodkaŭ i 25 tysiač masak raźmiarkujuć pamiž Hrodnam i Voranavam. Rešta pajedzie ŭ Miensk, a adtul u inšyja harady.
«Pandemija karanavirusa zakryła miežy, ale jana abjadnoŭvaje ludziej», — adznačyŭ hałoŭny doktar Siarhiej Cichanovič.
Cichanovič vykazaŭ padziaku polskamu boku i zaznačyŭ, što ichnaja dapamoha vielmi svoječasovaja. Pa słovach kiraŭnika špitala, miedyki zabiaśpiečanyja srodkami zaściarohi, ale «varta być hatovymi da luboha raźvićcia situacyi».
Jon adznačyŭ, što situacyja ŭ Hrodzienskaj vobłaści siońnia stabilnaja. Kolkaść chvorych pavialičvajecca, ale nie tymi tempami, jakich čakali. Vobłaść znachodzicca ŭ Biełarusi na apošnim miescy ŭ kolkaści chvorych na karanavirus — 190 čałaviek, u infiekcyjnym špitali Hrodna lažać 102 pacyjenty z karanavirusam. Pa słovach Cichanoviča, špital jašče nie zapoŭnieny całkam.
U aficyjnaj pieradačy humanitarnaj dapamohi ŭ Varšavie ŭziaŭ udzieł ambasadar Biełarusi ŭ Polščy Uładzimir Čušaŭ, kamendant Dziaržaŭnaj supraćpažarnaj słužby Andžej Bartkaviak, namieśniki ministra dziaržaŭnych aktyvaŭ i ministra zamiežnych spraŭ Maciej Malecki i Marcin Pšydač.
U jakaści donaraŭ vystupili dziaržaŭnyja pradpryjemstvy i Ministerstva achovy zdaroŭja Polščy, a pasiarednikam pry pieradačy — Fond mižnarodnaj salidarnaści. Dastaŭku zabiaśpiečvaje Dziaržaŭnaja supraćpažarnaja słužba.
Ciapier čytajuć
Ministr suviazi: Abmiežavańni mabilnaha internetu zakranuć 1,7 miljona biełarusaŭ9
Kamientary