Šuškievič pra svajho kolišniaha pamočnika Capkału: Jon byŭ katom, jaki hulaje sam pa sabie
Były kiraŭnik Biełarusi Stanisłaŭ Šuškievič, daradcam jakoha peŭny čas byŭ Valeryj Capkała (1993-1994), padzialiŭsia mierkavańniem pra vyłučeńnie byłoha dyrektara PVT kandydatam na prezidenckija vybary.
«Heta vysokaadukavany i razumny čałaviek, ale zahladvać u jahonuju dušu ja nie mahu.
U svoj čas, kali jon viedaŭ, što ja ciarpieć nie mahu tahačasnaha ministra zamiežnych spravaŭ Piatra Kraŭčanku, bo jon iłžyvy, podły, niahodny, łaziŭ pa Złučanych Štatach, pieraškadžaŭ usim, rabiŭ usio, kab mianie tudy nie zaprasili. Dyk voś, Capkała ž pryjšoŭ da mianie jak supracoŭnik Kraŭčanki i tak łoŭka acharaktarazavaŭ ministra, što ja zrazumieŭ: heta vielmi razumny čałaviek!
Paśla Capkała zachacieŭ pabyvać na Tajvani, i ŭ mianie byli peŭnyja mahčymaści jamu dapamahčy, chacia pilnaj patreby ŭ hetym nie było. Dumaju, što jon zdolny ŭ lubych abstavinach dziejničać vyhadnym dla siabie čynam.
Jon nie byŭ nikoli ŭ majoj kamandzie. Jon byŭ katom, jaki hulaje sam pa sabie. U jaho była takaja vysokaja kvalifikacyja, što ja z zadavalnieńniem zaprasiŭ jaho da siabie na pracu ŭ jakaści daradcy pa mižnarodnaj palitycy.
Capkała braŭsia za samyja roznyja spravy i dobra ich vykonvaŭ.
Mnie zdajecca, što Capkała moža być i sparynh-partnioram Łukašenki, i samastojnym kandydatam. Va ŭsialakim razie — heta nie ŭzrovień Hajdukieviča-małodšaha ci Ułachoviča.
Kali jon byŭ pasłom Biełarusi ŭ ZŠA, to ja mieŭ ź im nievialiki kantakt: u mianie skončylisia staronki ŭ pašparcie, kab atrymać kanadskuju vizu, a mnie treba było tudy źjeździć z ZŠA. Dyk Valeryj usio zrabiŭ chutka i akuratna, budučy ŭžo ŭ łukašenkaŭskaj kamandzie.
Kaniečnie, ja krychu ździviŭsia, kali pabačyŭ, što jon choča stać kandydatam. Ale potym padumaŭ: kali ŭ nas Dźmitryjeŭ choča być kandydatam, to jon u paraŭnańni z Capkałam prosta drobiaź. Kali ŭ nas Karatkievič była kandydatam, to heta cyrk. U spravie z Capkałam — heta nie cyrk.
Pa adukacyi, pa zdolnaści kiravać jon adpaviadaje tamu ŭzroŭniu, kab vyłučacca ŭ prezidenty. A ŭ čyjoj jon kamandzie, ci ŭ łukašenkaŭskaj, ci ŭ samastojnaj, ja nie zdahadajusia. Ja nie taki znaŭca ludziej».
Hladzi jašče: «Vy b i Styva Džobsa aryštavali»: piać faktaŭ pra Valeryja Capkału
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary