Kampanija «MTS» paviedamiła, što nie moža pieravieści svaju słužbu daviedki na biełaruskuju movu z‑za niedachopu finansavych srodkaŭ
Kampanija «Mabilnyja TeleSistemy» (MTS) nie moža pieravieści svaju słužbu daviedki IVR (0870) na biełaruskuju movu z‑za niedachopu finansavych srodkaŭ.
Pra heta havorycca ŭ adkazie kampanii na sumiesnuju zajavu mižnarodnaj maładziožnaj arhanizacyi «Małady front» i maładziožnaj arhanizacyi Partyi BNF «Moładź BNF» ab biełarusizacyi mabilnaj suviazi. Pra heta BiełaPAN paviedamiŭ adkazny sakratar «Moładzi BNF» Anton Kojpiš.
Niekalki tydniaŭ tamu aktyvisty «Maładoha frontu» i pradstaŭniki «Moładzi BNF» pieradali kiraŭnictvu kampanii «MTS» u Biełarusi bolej za 2.500 podpisaŭ, a taksama zvarot z prośbaj pierakłaści interfiejs na biełaruskuju movu, naroŭni z anhlijskaj i ruskaj.
U adkazie kampanii paviedamlajecca, što STAA «Mabilnyja TeleSistemy» acaniła mahčymaść stvareńnia biełaruskamoŭnaj viersii IVR.
«Z ulikam vysokaha koštu dadzienaha prajekta jaho realizacyja ŭ hetym hodzie nie źjaŭlajecca mahčymaj.Razam z tym, u vypadku palapšeńnia finansavych pakazčykaŭ, kampanija paŭtorna razhledzić mahčymaść realizacyi dadzienaha prajekta ŭ 2010 hodzie», — havorycca ŭ adkazie kampanii.
Akramia taho, u liście padkreślivajecca, što MTS prykładaje «maksimum namahańniaŭ dla absłuhoŭvańnia abanientaŭ u zručnaj dla ich formie».
Zaraz stvorana biełaruskaja viersija sajta kampanii, na jakuju zaziraje 0,76% naviedvalnikaŭ sajta.
«Mnie padajecca, što ŭ kampanii MTS vielmi dobra i vietliva navučylisia pisać adpiski z zaklikam ich nie turbavać i ničoha im nie prapanoŭvać. Maŭlaŭ, nie nazalajcie, my vierniemsia da pytańnia sami ŭ 2010 hodzie. Paśla hetaha składana im niešta prapanavać i ad ich niešta patrabavać. Akramia taho, pytańnie, chutčej, nie ŭ hrošach. Śpiecyjalisty kažuć, što heta sprava ŭ prahramnym zabieśpiačeńni, «biełarusizavać» jakoje — sprava dvuch dzion. Chutčej za ŭsie, sprava ŭ niežadańni hetym zajmacca», — skazaŭ A.Kojpiš.
Ciapier čytajuć
23‑hadovy achoŭnik z Astraŭca zahinuŭ za Rasiju na vajnie. Pavajavaŭ jon, vidać, kala miesiaca12
Kamientary