Aficyjnaja sacyjałohija: rejtynh davieru Łukašenku ŭ Minsku — 24%, Jarmošynaj — 11%
Biełaruskija sacyjałahičnyja słužby nie vymiarajuć elektaralny rejtynh palitykaŭ, bo nie atrymlivajuć zamovy na takija daśledavańni ad orhanaŭ ułady.
Tym nie mienš u krainie pastajanna pravodziacca sacyjałahičnyja apytańni, jakija vymiarajuć «uzrovień davieru» da roznych dziaržaŭnych orhanaŭ — naprykład, sudoŭ, milicyi, vojska.
Padličvajecca i «ŭzrovień davieru prezidentu». Heta adzinaja sacyjałahičnaja ličba, na jakuju moža aryjentavacca akružeńnie Łukašenki. Vyniki takich daśledavańniaŭ nie traplajuć u publičny dostup.
Čarhovaje takoje apytańnie pravodziłasia ŭ Biełarusi ŭ sakaviku-krasaviku 2020 hoda. U im pryniali ŭdzieł kala 2110 čałaviek (na roznyja pytańni ličba trochi bolšaja ci mienšaja), ź ich kala 395 čałaviek — u Minsku.
«Našaj Nivie» stali viadomyja vyniki hetaha daśledavańnia. Dakumient byŭ dasłany ŭ telehram-kanał žurnalista Arcioma Harbaceviča. Krynicy vydańnia paćvierdzili, što heta realny dakumient.
My publikujem niekatoryja ličby pa Minsku. Apytańnie Instytuta sacyjałohii pakazała, što ŭzrovień davieru kiraŭniku krainy ŭ stalicy apuściŭsia da 24%. U raniejšyja hady ličba była istotna bolšaj.
Varta mieć na ŭvazie, što ŭ aŭtarytarnych krainach ludzi, atrymlivajučy zvanok z pytańniami pra palityčnuju situacyju, čaściakom paźbiahajuć adkazaŭ z krytykaj ułady.
Cikavaja i situacyja sa staŭleńniem hramadstva da Centrvybarkama na čale ź Lidzijaj Jarmošynaj. Jamu daviarajuć 11,1% apytanych minčukoŭ — takoha nizkaha davieru niama ni da adnaho viedamstva.
Ci daviarajecie vy prezidentu? (Minsk)
| Adkaz | Kolkaść | Pracent |
| Tak | 95 | 24% |
| Nie | 149 | 37,6% |
| Niama adkazu/składana adkazać | 152 | 38,4% |
***
Ci daviarajecie vy Centrvybarkamu? (Minsk)
| Adkaz | Kolkaść | Pracent |
| Tak | 44 | 11,1% |
| Nie | 188 | 47,7% |
| Niama adkazu/składana adkazać | 163 | 41,2% |
Kamientary