«U vojska jamu chaciełasia ad słova «nijak». Što kažuć znajomyja pra sałdata, jaki zahinuŭ u vojsku
20-hadovy Siarhiej Vałošyn zahinuŭ 8 červienia ŭ adnoj z vajskovych častak ad ahniastrelnaj traŭmy. Pra heta aficyjna paviedamiła Ministerstva abarony.
«Śledztva raźbirajecca va ŭsich abstavinach taho, što adbyłosia. Pravodziacca śledčyja dziejańni, pracesualnyja mierapryjemstvy», — paviedamiŭ Cvabodzie pradstaŭnik Śledčaha kamitetu Siarhiej Kabakovič.
Siarhiej rodam z Horadni. Jak stała viadoma Svabodzie ad znajomych chłopca, da pryzyvu ŭ vojska jon vučyŭsia ŭ chimika-technalahičnym kaledžy. U kancy minułaha navučalnaha hodu, pa słovach siabroŭ niabožčyka, u jaho ŭźnikli prablemy pa vučobie. Siarhieja adličyli, jon pajšoŭ pracavać na pradpryjemstva, źviazanaje z drevaapracoŭkaj, dzie raniej prachodziŭ praktyku.
Uvosień 2019-ha jaho zabrali ŭ vojska na paŭtara hoda. Pavodle siabroŭ, słužbu Siarhiej prachodziŭ u vojskach SPA, u zenitna-rakietnaj bryhadzie kala vioski Šaršuny.
«Što tyčycca vojska, to jon kazaŭ, što razumieje ŭsie jaho ciažkaści i što jon, chutčej za ŭsio, budzie adstavać u svajoj rocie. A tych, chto adstaje, trecirujuć. Tamu ŭ vojska jamu chaciełasia ad słova «nijak». Jon byccam by toje samaje kazaŭ i psycholahu ŭ vojsku, kali ja pravilna pamiataju», — skazaŭ Svabodzie siabar chłopca pa internacie Mikita.
Apošni raz Mikita kantaktavaŭ z Vałošynym u lutym. Kaža, skłałasia ŭražańnie, što Siarhiej nia maje prablemaŭ na słužbie: «Nie biaz zahvazdak, ale jon spraŭlaŭsia».
Siabar charaktaryzuje jaho jak zvyčajnaha chłopca, jaki, jak i astatnija maładyja chłopcy, cikavicca kamputarnymi hulniami, navukova-papularnymi kanałami, histaryčnymi rekanstrukcyjami.
«Jon byŭ davoli intelihientnym čałaviekam, staraŭsia zaŭsiody być na pazytyvie. Mnohija ludzi z majho koła adhuknucca pra jaho stanoŭča. Imknuŭsia daviedvacca novyja rečy i raskazvać pra heta inšym ludziam. Lubiŭ abmiarkoŭvać ź imi amal usio — ad siaredniaviečnych vajennych taktyk i pobytu da technalohij budučyni».
U Siarhieja było šmat siabroŭ u inšych krainach, asabliva ŭ Rasiei. Pa słovach inšaha siabra, dziakujučy internetu Vałošyn trapiŭ u internacyjanalnuju kampaniju. Maładych ludziej abjadnała zachapleńnie rolevymi hulniami.
«Jon byŭ dosyć zamkniony i niešmatsłoŭny, ale maksymalna ŭraŭnavažany. Byŭ razumny i šmat čytaŭ, byŭ pryjemny ŭ kamunikacyi. Moh pažartavać, nia byŭ sacyjapatam», — raskazvaje inšy siabar Vałošyna.
Pa jaho słovach, Siarhiej u vojska nie chacieŭ, bo razumieŭ, «jakaja abstanoŭka ŭ Biełarusi».
«Ale jakija byli varyjanty?» — kaža siabar sałdata.
Siabry Vałošyna ŭ samahubstva nia vierać i kažuć, što chłopiec byŭ dastatkova «spakojny i moh pieražyć prablemy», kali b jany byli. Pa ich słovach, siamja niabožčyka daviedałasia pra zdareńnie 9 červienia.
«U kožnaha z nas rozny zapas tryvałaści. Kali vy spytajecie, ci byŭ Siarhiej takim čałaviekam, jaki paličyŭ by heta najlepšym vychadam, to nie, heta małavierahodna. Ale ja nie vyklučaju takoj sytuacyi, prosta tamu, što ŭ nas niama nijakaj infarmacyi».
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami10
Kamientary