«Vybary skončylisia, pačałasia realnaja kampanija supraćstajańnia». Dźmitryjeŭ padaŭ dakumienty ŭ CVK
Sustaršynia «Havary praŭdu» Andrej Dźmitryjeŭ padaŭ u CVK dakumienty na rehistracyju kandydatam u prezidenty, piša Tut.by.
Dźmitryjeŭ pryznaŭsia, što padaje dakumienty ź vielmi ciažkim sercam. Jon adznačyŭ, što «pa idei heta pavinien być radasny dzień dla kandydata, kamandy, jakaja vykłałasia na vybarach, ale toje, što adbyvajecca siońnia ŭ krainie — heta absalutnaja biezzakonnaść».
— Ja liču, što, u pryncypie, praktyčna možna kazać pra toje, što vybary ŭ Biełarusi skončylisia, pačałasia realnaja kampanija supraćstajańnia.
Ja kali jeździŭ [pa rehijonach], bačyŭ, dumaju, usie heta bačyli, ludzi chacieli spakojna, mirna pamianiać uładu. Pra Majdan, jakim nas pałochaje Łukašenka, dumaje tolki jon, a ŭsie ludzi prosta chacieli pryjści, prahałasavać za svaich kandydataŭ i ŭbačyć 9 žniŭnia, ci kali budzie druhi tur, novaha prezidenta. Heta hałoŭny, jak mnie zdajecca, nastroj u ludziej.
I siońnia, ja dumaju, vielizarnaja kolkaść biełarusaŭ, jakija hladziać na toje, što adbyvajecca, z adnaho boku ŭ šoku ad hetaha, tamu što ŭsio ž taki, jak by nie byli hatovyja da taho, što ŭłada tvoryć, ale ŭpieršyniu na vybarach ułada kidaje palityčnych apanientaŭ u turmu navat nie dačakaŭšysia rehistracyi, nie kažučy ŭžo pra kaniec vybaraŭ. Siońnia dźvie strašnyja statystyki: kožny dzień adkryvaješ naviny i hladziš, kolki chvorych na karanavirus i kolki dadałosia ludziej, jakich za palityčnyja pohlady kinuli ŭ turmu. Usio heta absalutna nieprymalna i absalutna prynižaje biełarusaŭ. Usio, čym ułada zajmajecca siońnia — prynižeńniem biełarusaŭ. Čaho b heta ni tyčyłasia: hniłaja vada, jakuju nam kažuć «picie!», ludzi, jakich sadžajuć u turmy, ciapier z hetymi podpisami — kali ŭsim usio zrazumieła, — skazaŭ Dźmitryjeŭ.
Pretendent taksama padkreśliŭ, što budzie vykarystoŭvać kampaniju dla taho, kab havaryć ab biezzakonnaści, damahacca vyzvaleńnia Viktara i Eduarda Babarykaŭ, Siarhieja Cichanoŭskaha, Ihara Łosika i ŭsich, kaho aryštavali. Jon taksama padtrymaŭ Valeryja Capkału ŭ suviazi z pravierkaj, jakuju pravodzić MUS.
Kamientary