«Ź lubimaj krainaj treba być na adlehłaści»: kaardynatar #BYCOVID19 Andrej Stryžak źjechaŭ ź Biełarusi
Siońnia na svajoj staroncy ŭ Facebook pravaabaronca i vałancior Andrej Stryžak paviedamiŭ: vymušany na čas pakinuć krainu. Jon prakamientavaŭ TUT.BY, što nijakich aficyjnych pretenzij z boku pravaachoŭnych orhanaŭ da jaho nie pastupała, ale pakul jon ź siamjoj budzie va Ukrainie, što dalej — pakaža čas.
«Siabry, apošnija paŭhoda byli adnymi z samych napružanych u maim žyćci. Mnohaje zroblena i dasiahnuta i mnohaje jašče napieradzie. Sihnały, jakija mnie pasyłaŭ suśviet, kazali pra toje, što mnie treba na čas pakinuć krainu. Što ja i zrabiŭ. Kampanija #BYCOVID19, u jakoj ja ŭdzielničaŭ dystancyjna, amal usie try miesiacy siedziačy ŭ Homieli, ad hetaha nie pacierpić. Pracujem dalej! Ubačymsia z vami krychu paźniej. Tak treba», — taki zapis siońnia ŭ Facebook pakinuŭ pravaabaronca i vałancior #BYCOVID19 Andrej Stryžak, supravadziŭšy jaje fatahrafijaj ź biełaruska-ŭkrainskaj miažy.
Niadaŭna Stryžak raspaviadaŭ u intervju TUT.BY pra toje, jak padčas pandemii vałanciory ŭmudrajucca «dastać z-pad ziamli» chałaty, reśpiratary, kaściumy i pryvieźci ŭ balnicu, jakoj patrebna dapamoha: u Minsku, Hłybokim, Dokšycach, Homieli i inšych haradach. Usiaho dapamohu atrymali 483 miedustanovy. Było sabrana bolš za 360 tysiač dalaraŭ.
— Andrej, vaša rašeńnie z adjezdam źviazana z kampanijaj #BYCOVID19?
— Nie, aficyjnych pretenzij da mianie nie pastupiła, — adkazvaje Stryžak. — Heta sukupnaść faktaraŭ. Hledziačy na situacyju ŭ krainie, ja pryniaŭ takoje rašeńnie. Možna ličyć heta doŭhačakanym adpačynkam. Takaja mahčymaść razhladałasia daŭno. Kančatkovaje rašeńnie časova vyjechać ź Biełarusi źviazana tolki z maim dobra arhumientavanym žadańniem pabyć pa-za miežami krainy ŭ hety składany momant. Z #BYCOVID19 usio dobra.
Tyja, chto chacieŭ dapamahčy miedycynskim supracoŭnikam i daktaram padčas karanavirusa, pieraličvali hrošy #BYCOVID19 praz sajt MolaMola. MolaMola — fandrajzinhavaja płatforma, zapuščanaja z dapamohaj kraŭdfandynhovoj płatformy Ulej.by, čyim finansava-technałahičnym partnioram źjaŭlajecca Biełhazprambank, jakim 20 hadoŭ kiravaŭ Viktar Babaryka. Paśla zatrymańnia Babaryki Biełhazprambank zabłakavaŭ płaciažy na placoŭcy pa zbory srodkaŭ MolaMola.
— Vy źjechali z krainy adzin? — pytajemsia ŭ Stryžaka.
— Nie, razam ź siamjoj. Nie tak daŭno Ukraina źmianiła praviły ŭjezdu dla biełarusaŭ, paśla pierasiačeńnia miažy my pavinny budziem 14 dzion znachodzicca na karancinie. Što dalej — pakaža čas, data viartańnia ŭ Biełaruś adkrytaja. Pakul ź lubimaj krainaj treba pabyć na adlehłaści, — prakamientavaŭ Andrej Stryžak.
Kamientary