Pa spravie «Biełhazprambanka» siłaviki zatrymali byłoha dyrektara DFR, jaki staŭ bankiram
U ramkach «spravy Biełhazprambanka» zatrymany były dyrektar Departamienta finansavych rasśledavańniaŭ Kamiteta dziaržkantrolu Anatol Hramovič. Hetu infarmacyju TUT.BY paćvierdzili ŭ pres-słužbie KDK.
«Tak, zatrymany. U ramkach rasśledavańnia kryminalnych spraŭ u dačynieńni da byłych i ciapierašnich supracoŭnikaŭ Biełhazprambanka», — skazali ŭ KDK.
Były namieśnik načalnika Upraŭleńnia KDB pa Bresckaj vobłaści Anatol Hramovič uznačaliŭ DFR u studzieni 2002 hoda. Adbyłosia heta nieŭzabavie paśla taho, jak były Dziaržaŭny kamitet finansavych rasśledavańniaŭ straciŭ svaju samastojnaść i šlacham pieraŭtvareńnia ŭ Departamient uvajšoŭ u skład Kamiteta dziaržkantrolu.
Hramovič uznačalvaŭ finansavuju milicyju da listapada 2006 hoda. U studzieni 2009 hoda jaho zatrymali. Słuchańnie spravy pačałosia ŭ mai 2010 hoda, pasiadžeńni pravodzilisia ŭ zakrytym farmacie. Da kryminalnaj adkaznaści byli pryciahnuty 36 čałaviek, bolšaść ź jakich źjaŭlalisia słužbovymi asobami mytni «Zachodni Buh» i Upraŭleńnia KDB pa Bresckaj vobłaści. Usie jany, pa vysnovach śledstva «ŭ składzie złačynnaj arhanizacyi vosieńniu 2001 hoda ažyćciavili niezakonnaje pieramiaščeńnie z vykarystańniem padroblenych dakumientaŭ praz mytniu «Zachodni Buh» kampjutarnaj techniki, abutku, pryčyniŭšy škodu dziaržavie na sumu bolš za 20 miljardaŭ rubloŭ».
15 listapada 2011 hoda Biełaruski vajskovy sud pryznaŭ 25 abvinavačanych nievinavatymi za niedakazanaściu ŭ častcy ŭčynienych złačynstvaŭ. U ich liku Anatol Hramovič i były namieśnik načalnika mytni «Zachodni Buh» Jaŭhien Sielivanaŭ.
U 2012 hodzie Hramovič staŭ členam Rady dyrektaraŭ rasijskaha «StarBanka», jakomu ŭ Biełarusi naležaŭ «Interpejbank» (raniej «Kredeksbank»). U 2015 hodzie akcyjaniery pryniali rašeńnie ab likvidacyi «Interpejbanka». Heta rašeńnie rušyła ŭśled za tym, jak Nacbank adklikaŭ u «Intierpejbanka» ŭsie licenzii na ažyćciaŭleńnie bankaŭskaj dziejnaści.
Kamientary