STB nazvała traŭmy piacihadovaj dziaŭčynki ŭ Hrodnie niaščasnym vypadkam. Pra siłavikoŭ, jakija raźbili dubinkaj škło ŭ mašynie, — ni słova
Fotazdymki piacihadovaj Juli z Hrodna, jakaja paciarpieła ŭ časie pratestaŭ, ablacieli sacsietki i miesiendžary.
Maci dziaŭčynki Ina raspaviadała TUT.BY na nastupny dzień paśla zdareńnia, jak byli atrymanyja traŭmy.
Uviečary 11 žniŭnia siamja jechała z adnaho kanca horada ŭ druhi, abjazdžajučy pierakryty centr praz vulicu Savieckich pahraničnikaŭ. Tam, kala kalca, prachodziła akcyja pratestu aŭtamabilistaŭ: jany hučna sihnalili.
«Napieradzie nas byli Skoda i mikraaŭtobus. My razhubilisia, kali ŭbačyli, jak vajennaja technika napieradzie pačynaje padrazać bus — i toj razvaročvajecca bokam. Muž vyjechaŭ na sustrečnuju pałasu, kab abjechać. Ale nasustrač nam vybiehli amapaŭcy, pačali bić mašynu dubinkami — łabavoje i bakavoje škło, lusterki. Paśla hetaha zzadu ŭ nas ujechała vajskovaja technika, byŭ mocny ŭdar», — tłumačyła abstaviny maci dziaŭčynki Ina.
Ale zaraz telekanał STB daje zusim inšuju viersiju padziej, pavodle jakoj adbyŭsia prosta niaščasny vypadak.
«Siamja Čeravuchaŭ — absalutna realnyja ludzi, na mitynhi nie chodziać, žyvuć svaim žyćciom, ale praz akcyi pratestu, jakija prachodzili ŭ centry Hrodna, im daviałosia ŭ toj viečar jechać dadomu ŭ abjezd. Pa darozie jany patrapili ŭ avaryju», — tak padaje zdareńnie STB.
U paćvierdžańnie hetaj viersii televizijščyki dajuć kamientar baćki dziaŭčynki Uładzimira.
«Viartalisia dadomu, pierad nami było šmat mašyn. Ja spałochaŭsia, vyjechaŭ na sustrečnuju pałasu, paśla čaho, praź imhnieńnie litaralna, adbyłosia sutyknieńnie», — kaža Uładzimir Čaravucha.
«Atrymlivajecca, siłaviki nie taranili — avaryja adbyłasia vypadkova. Siamja ŭdziełu ŭ pratestach nie prymała, ale vinavatych ŭžo pryznačyli, materyjały ŭžo ŭ sietcy», — padsumoŭvaje STB.
Kamientary