U Biełaruskim dziaržaŭnym univiersitecie infarmatyki i radyjoelektroniki da biesterminovaha strajku dałučylisia 37 supracoŭnikaŭ-dacentaŭ, vykładčykaŭ i asistentaŭ kafiedr. Śpis papaŭniajecca.
Jak raspavioŭ dev.by adzin sa strajkoŭcaŭ vykładčykaŭ, chtości ź ich adpuskaje studentaŭ sa svaich par, chtości abmiarkoŭvaje na zaniatkach toje, što adbyvajecca ŭ krainie.
Kiraŭnictva VNU, pavodle słoŭ krynicy, «nijak nie reahuje na heta». «Ni da dekanaŭ, ni da kiraŭnikoŭ kafiedr nikoha z nas nie vyklikali», — adznačaje jon.
— Da strajku dałučylisia nie tolki vykładčyki, ale i daktary navuk, dacenty — cisnuć na ich, pahražać zvalnieńniami niemetazhodna, sprava budzie vielmi hučnaj.
Sam surazmoŭca dev.by nie baicca stracić pracu ŭ VNU, pakolki sumiaščaje jaje z pracaj u kampanii: «Heta chutčej dla dušy — jak mahčymaść pieradać svoj vopyt maładym śpiecyjalistam».
Siarod strajkoŭcaŭ-vykładčykaŭ bolš za ŭsio z fakulteta kampjutarnych sistem i fakulteta kampjutarnaha prajektavańnia — 25 čałaviek z 37. Naša krynica spadziajecca, što da strajku dałučacca i inšyja jahonyja kalehi: «Jany salidarnyja z nami, ale pakul bajacca vystupić adkryta».
Niekalki ŭładalnikaŭ i topaŭ IT-kampanij hatovyja padtrymać vykładčykaŭ u vypadku represij z boku administracyi BDUIR.
Kamientary