Paśla žorstkaha źbićcia ŭ Pinskim HAUS majstar muzyčnych instrumientaŭ Andrej Škloda źjechaŭ u Čechiju
Imia hienijalnaha majstra muzyčnych instrumientaŭ Andreja Šklody ź Pinska viadoma daloka za miežami Biełarusi. U Andreja nie było śpiecyjalnaj adukacyi, jon — samavuk. Ale vučycca da jaho tonkaściam redkaha ramiastva pryjazdžali majstry z Rasii, Ukrainy, krain Bałtyi. Na vyrablenych im instrumientach siońnia hrajuć biełaruskija i zamiežnyja znakamitaści. Pra toje, jak źmianiłasia žyćcio muzyki paśla padziej žniŭnia, piša «Miedyja-Paleśsie».
10 žniŭnia Andrej byŭ žorstka źbity supracoŭnikami siłavych struktur. Spačatku na vulicy Kirava ŭ Pinsku, dzie jaho razam z bratam Ramanam schapili nieviadomyja i dastavili ŭ budynak Pinskaha HAUS. Zatym hvałt praciahvaŭsia ŭ adnym z kabinietaŭ, potym u pamiaškańni strałkovaha cira. Patrabavali pryznacca, što ŭ noč z 9 na 10 žniŭnia znachodziŭsia ŭ šerahach pratestoŭcaŭ.
Palitykaj nie cikaviŭsia, navat na vybary nikoli nie chadziŭ. Jaho cikavaściu pa žyćci była muzyka, a hałoŭnym bahaćciem — ruki i tonki muzyčny słych. Jakraz pa ich i pryjšoŭsia asnoŭny ŭdar kułakami, dubinkami i botami. Andreja źbivali tak, što hałava była padobnaja na miač, a ruki nadoŭha stracili adčuvalnaść. U pierapynku pamiž źbićciom jon lažaŭ u łužynie ŭłasnaj kryvi, prycisnuty da padłohi čužym botam. A jašče byŭ strach za svaich blizkich. Siłaviki prahladali źmieściva jaho mabilnaha telefona, fatahrafii žonki i syna i pahražali pryjechać da jaho ŭ Kudryčy i zładzić raspravu nad siamjoj.
U adzin mih byli rastaptanyja mary pra ščaślivaje siamiejnaje žyćcio ŭ paleskaj hłybincy. Niezadoŭha da žnivieńskich padziej Andrej Škloda viarnuŭsia z Polščy. Kupiŭ domik u vioscy Kudryčy i pierabraŭsia siudy razam ź siamjoj. Źbiraŭsia addać syna ŭ najbližejšuju sielskuju škołu.
Pamiatajučy pra pahrozy raspravy, Andrej doŭhi čas bajaŭsia viartacca dadomu, žyŭ u brata i znachodziŭsia ŭ stanie depresii.
Na dapamohu hienijalnamu majstru pryjšła muzyčnaja supolnaść. Daviedaŭšysia pra toje, što ź im zdaryłasia, muzykanty arhanizavali Andreju i jaho bratu Ramanu kurs reabilitacyi ŭ Čechii.
Jak raspaviała Miedyja-Paleśsiu ich siastra Volha, paśla taho, što z Andrejem zdaryłasia 10 žniŭnia ŭ Pinsku, jon baicca viartacca ŭ Biełaruś, dzie čałavieka prosta tak mohuć schapić na vulicy, dastavić u adździaleńnie milicyi i tam źbivać. I maje namier zastacca ŭ Čechii. Biełaruskaja dyjaspara tam vielmi haścinna pryniała svaich ziemlakoŭ. Dapamahaje i maralna, i materyjalna. Kłapocicca pra ich i češskaja dziaržava. Siońnia braty vyvučajuć češskuju movu, płanujuć znajści sabie pracu ŭ Čechii.
U pačatku listapada da svaich mužoŭ adpravilisia i žonki ź dziećmi. Siemji ŭźjadnalisia.
Ciapier čytajuć
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach3
Kamientary