U Breście 5 hadoŭ kałonii atrymaŭ piensijanier, jaki ŭ kabiniecie «streliŭ» u supracoŭnika DAI
7 śniežnia ŭ Breście abviaścili prysud 70-hadovamu Alaksandru Kavaleviču, jaki abvinavačvaŭsia ŭ hvałcie ŭ dačynieńni da supracoŭnika milicyi z pomsty za vykanańnie słužbovaj dziejnaści. Letaś abvinavačany ŭžo atrymaŭ miesiac aryštu za toje, što abliŭ bienzinam rabotnika adździeła prymusovaha vykanańnia. Nahoda dla dvuch napadaŭ była adna i taja ž — štraf za kiravańnie niezarehistravanym mapiedam, piša Tut.by.
Sud pryznaŭ piensijaniera, jakoha sudzili za toje, što ŭ lipieni hetaha hoda streliŭ niekalki razoŭ ź fiejervierku ŭ načalnika mižrajonnaha adździeła DAI Juryja Šykunca, vinavatym i pryznačyŭ 5 hadoŭ pazbaŭleńnia voli ŭ kałonii ahulnaha režymu.
Da jaho taksama vyrašyli prymianić prymusovyja miery biaśpieki i lačeńnia — jak da «asoby, jakaja ŭčyniła złačynstva ŭ stanie źmienšanaj adekvatnaści».
Lačyć Alaksandra Uładzimiraviča buduć pa miescy adbyćcia pakarańnia.
Prysud nie ŭstupiŭ u zakonnuju siłu i moža być abskardžany.
Nahadajem, 70-hadovaha Alaksandra Kavaleviča ŭ śniežni minułaha hoda ŭžo sudzili za hvałt u dačynieńni da supracoŭnika adździeła prymusovaha vykanańnia. Matyvam napadaŭ stali štrafy, jakija pryznačyli jamu ŭ 2019 hodzie za jazdu na mapiedzie. Transpartny srodak Alaksandr Uładzimiravič nie zarehistravaŭ, strachoŭku na jaho nie afarmlaŭ, ale ŭ horad vyjazdžaŭ.
U adzin z takich vyjezdaŭ jaho spynili inśpiektary DAI. Na piensijaniera aformili pratakoły za jazdu biez rehistracyi i strachoŭki.
Alaksandra Uładzimiraviča vyklikali ŭ DAI na razhlad. Tam abvinavačany ŭ pieršy raz ubačyŭ paciarpiełaha. Pra toje, jak raźvivalisia padziei ŭ kabiniecie Juryja Šykunca, u bakoŭ roznyja viersii. Piensijanier nastojvaje, što na jaho tłumačeńni nie źviarnuli naležnaj uvahi. Inśpiektar z hetym nie pahadziŭsia. Juryj Šykuniec u sudzie rastłumačyŭ, što vysłuchaŭ pravaparušalnika, pieradaŭ rekvizity dla apłaty štrafaŭ i patłumačyŭ, kudy źviarnucca dla rehistracyi mapieda.
Z DAI abvinavačany vyjšaŭ sa štrafam u pamiery 100 rubloŭ. Pa dvuch pratakołach jamu pryznačyli minimalnaje hrašovaje spahnańnie: adna bazavaja za adsutnaść rehistracyi i try — za strachoŭku.
Alaksandr Uładzimiravič pastanovu nie abskardziŭ. U sudzie piensijanier rastłumačyŭ, što na apłatu štrafaŭ u jaho nie było hrošaj: maŭlaŭ, u miesiac jamu naličvajuć blizu 300 rubloŭ piensii, častku ź ich jon vydatkoŭvaje na kamunałku.
Terminy na dobraachvotnuju apłatu štrafaŭ vyjšli, i materyjały nakiravali dla prymusovaha spahnańnia. U vyniku ŭ piensijaniera aŭtamatyčna zrezali čarhovuju piensiju. Heta aburyła Alaksandra Uładzimiraviča. Jon pryjšoŭ u rajonny adździeł APV, dastaŭ z pakieta butelku ź bienzinam — i vyliŭ źmieściva na hałavu 28-hadovamu sudovamu vykanaŭcu, jaki navat nie razhladaŭ hetuju spravu. Na ščaście, małady čałaviek nie paciarpieŭ. U śniežni minułaha hoda piensijaniera pryznali vinavatym u pahrozie hvałtam u dačynieńni da słužbovaj asoby z pomsty i pryznačyli miesiac aryštu. Termin Alaksandr Uładzimiravič adbyŭ, ale kryŭda zastałasia.
27 lipienia hetaha hoda piensijanier pryjechaŭ u MREA, dačakaŭsia, pakul z kalidora syduć inšyja, padpaliŭ knot i padyšoŭ da kabinieta Juryja Šykunca. Kali «rymskaja śviečka» pačała «stralać», piensijanier nakiravaŭ jaje ŭ bok inśpiektara.
Adzin z snaradaŭ zakranuŭ inśpiektara pa plačy. Paśla hetaha Juryj Šykuniec padbieh da napadnika i advioŭ fiejervierk u bok. Alaksandra Uładzimiraviča zatrymali i nadzieli kajdanki. Na pytańni paciarpiełaha jon adkazvaŭ abrazami i pahrozami.
Kamientary