Navahodni zvarot Alaksandra Łukašenki

Darahija suajčyńniki i hości Biełarusi!

Čas niaŭmolna nabližaje nas da apošnich imhnieńniaŭ vysakosnaha 2020 hoda. Nas chvaluje, jakim jon byŭ i što nas čakaje ŭ budučym.

Adychodziačy hod byŭ jarkim i svojeasablivym. Jon prymusiŭ biełarusaŭ šukać adkazy na spradviečnyja pytańni: «Chto my?», «Što budzie z nami, našymi dziećmi?», «Kudy my idziom?» i «Čaho my chočam?».

My asabliva vostra ŭśviadomili, što majem i što možam stracić, prytym - niezvarotna.

Hod abjadnaŭ čałaviectva kłopatam pra zdaroŭje. A Haspodź pakazaŭ nam naša miesca ŭ hetym śviecie i papiaredziŭ ab adkaznaści za harmoniju z pryrodaj.

Dziakujučy niejmaviernym namahańniam dziaržavy my vystajali i nabyli ŭpeŭnienaść u zaŭtrašnim dni. A hałoŭnaje - nie pakinuli dziaciej biez budučyni!

Słovam, nam patrebny byŭ hety hod, kab zrazumieć, chto jość chto, kab pa-sapraŭdnamu acanić zroblenaje i ŭbačyć, što my nacyja, zdolnaja vyžyć u hetym burlivym śviecie tolki tady, kali my adzinyja, kali my razam.

Naša apora - bahaty histaryčny vopyt. My naśledniki vialikich pakaleńniaŭ biełarusaŭ, jakich los na praciahu tysiačy hadoŭ łamaŭ i nieadnarazova vypraboŭvaŭ na tryvałaść. Ale jany mužna i śmieła stvarali svaju budučyniu. I nikoli nie stračvali suviaź z rodnaj ziamloj. Jana - naša ŭsio. Bieź jaje my nie budziem narodam.

Tryłohija «Małoj radzimy», jakuju my zaviaršyli ŭ 2020-m, jašče raz dała mahčymaść zrazumieć, što tolki ŭ rodnaj ziamli krynica našych sił. Hetyja siły dapamahajuć nam dasiahać namiečanyja mety. I, padvodziačy vyniki čarhovaj piacihodki, my bačym: nam jość čym hanarycca.

Biełaruś stała jadziernaj dziaržavaj, zrabiła krok u kosmas, asvoiła vytvorčaść lehkavych aŭtamabilaŭ i elektramabilaŭ, stvaryła bijatechnałahičnuju karparacyju, asvoiła rakietnuju vytvorčaść, raźviła IT.

Ale samaje hałoŭnaje - my zachavali charčovuju biaśpieku. I ŭ toj čas, kali ludzi ŭ bahatych krainach vystrailisia ŭ kiłamietrovyja čerhi za kavałkam chleba, našy sialanie zabiaśpiečyli biełarusaŭ nieabchodnymi praduktami charčavańnia.

Ludzi ŭ pahonach papiaredzili našych niepryjacielaŭ: abarona dziaržavy, hramadskaja biaśpieka buduć zabiaśpiečany rašuča i biez vahańniaŭ!

Ludzi ŭ biełych chałatach pakazali svoj prafiesijanalizm u baraćbie ź ciažkimi chvarobami.

Sapraŭdnyja nastaŭniki i vykładčyki prademanstravali ŭzrovień biełaruskaj adukacyi.

Vučonyja i inžyniery Biełarusi stvaryli ŭnikalnyja ŭzory ŭ mašynabudavańni, chimii, naftachimii.

Heta značyć, my nie zastyli na miescy. Źmianiŭsia śviet, źmianilisia i my. Našy pieramieny - heta raźličanaja i pradumanaja evalucyja.

Vy viedajecie, niekatoryja z nas, sutyknuŭšysia z vyklikami vysakosnaha hoda, chočuć viarnucca ŭ Biełaruś, jakoj jana była hodam raniej.

Ja, viadoma, rady, što vy acanili dasiahnutaje, ale viartacca ŭ minułaje my nie budziem. U nas niama času iści nazad i prachodzić projdzienaje. My abaviazkova stvorym Biełaruś budučaha, i jana budzie lepšaja za ciapierašniuju. Dla hetaha treba prosta adpravić 2020-y ŭ historyju. Ale nie zabyć jaho ŭroki. Nam usim, chto bačyć śviet pa-roznamu, treba ŭśviadomić, što ŭ nas adzinaja kaštoŭnaść - kavałačak ziamli ŭ centry Jeŭropy.

Inšaha nie dadziena. I ŭ imia zachavańnia jaho dla dziaciej davajcie pierahorniem staronku projdzienaha i budziem razam pisać novy raździeł niezaležnaj Biełarusi. Davajcie budučy hod zrobim hodam narodnaha adzinstva.

Budziem žyć svaim rozumam, stvarać kaštoŭnaści svaimi rukami. Bierahčy, daražyć i lubić tak, jak mohuć tolki biełarusy - razumnaja, talerantnaja, nakiravanaja ŭ budučaje nacyja! I kali my chočam «ludźmi zvacca», my heta zrobim!

Darahija siabry!

U hetyja chviliny našy sercy bjucca asabliva mocna. My ź luboŭju hladzim na rodnych i blizkich, razumiejučy, što ŭ ich naša ščaście i sens žyćcia. Dziakujem im za padtrymku i vieru, jakija dapamahajuć iści da met, pieraadolvajučy lubyja pieraškody. I my spadziajomsia, što našy mary abaviazkova ździejśniacca.

Niachaj nadychodziačy 2021 hod stanie dla ŭsich nas hodam ažyćciaŭleńnia samych dobrych, śvietłych i čystych žadańniaŭ!

Mužnaści, vytrymki i ciarpieńnia na hetym šlachu vam, patryjotam Radzimy! Miru i dabrabytu vašym siemjam i dzieciam. Budźcie zdarovyja i ščaślivyja, bieražycie adno adnaho.

Z Novym hodam vas i vašych haściej!

• 0
• 0
• 0
• 0
• 0
• 0
• 0
• 0