Paśla ŭdaru ad nieviadomaha trenier pa bodzibiłdynhu trapiŭ u komu. Blizkija dapuskajuć palityčny kanflikt
Kanflikt viadomaha minskaha fitnies-treniera Antona Kačanava ź nieznajomym mužčynam u kramie pryvioŭ da dvuchtydniovaj komy.
Incydent adbyŭsia ŭ noč na 19 śniežnia. U kramie adbyłasia sprečka ź nieviadomym mužčynam, jaki ŭdaryŭ Antona na vychadzie. Traŭmatyčnaje padzieńnie i ŭdar hałavoj pryviali da komy.
«U Antona pierałom zvodu čerapa, była ciažkaja apieracyja z vydaleńniem hiematom, apieryravaŭ viadomy niejrachirurh Dźmitryj Viejeŭnik», — raskazała «Našaj Nivie» niaviesta Antona, Śviatłana.
«Ni ja, ni mama Antona dva dni nie viedali ab tym, što adbyłosia. U BCHMD jon dva dni lažaŭ jak «nieviadomy». Taho, chto biŭ, užo zatrymali, pravodziacca śledčyja dziejańni. Mama Antona była ŭ śledčaj, i tam prahučała słova «patryjot» u dačynieńni da złačyncy. Ja bajusia pamylicca, ale pa hetym słovie možna dapuścić, što kanflikt moh adbycca pa palityčnych pryčynach», — dadaje Śviatłana.
Sapraŭdy, Anton Kačanaŭ svaju pazicyju vyjaŭlaŭ adkryta — u «šapcy» 50-tysiačnaha instahrama jon pastaviŭ nacyjanalnyja bieła-čyrvona-biełyja kolery, źmiaščaŭ žałobnyja dopisy pra Ramana Bandarenku.
Ciapier blizkija čakajuć, pakul Anton vierniecca ŭ prytomnaść i sam raskaža ab padziejach taho viečara.
«31 śniežnia jaho adklučyli ad miedykamientoznaj komy, u jakoj jon byŭ dva tydni. Siońnia ranicaj ja była ŭ jaho — ciapier Anton trochu raspluščvaje vočy, sprabuje varušyć rukami-nahami, ledź-ledź. Daktary kažuć, što jon ciapier ničoha nie razumieje, ale stan stabilny. Ciažki, ale stabilny: tempieratura narmalnaja, cisk. Usie čakajuć, pakul jon adydzie ad siedatyŭnych srodkaŭ, kab znoŭ pravieści daśledavańnie i vyznačyć stupień paškodžańniaŭ. Mahčyma, Anton całkam adnovicca, pakul nieviadoma», — skazała Śviatłana.
«Naša Niva» źviarnułasia z zapytam u Śledčy kamitet, prosim apublikavać słovy padazravanaha ab jaho matyvach.
Ciapier čytajuć
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1414
Kamientary