Biełaruskuju movu na CT buduć zdavać 65 tysiač abituryjentaŭ
Usiaho ŭ hetym hodzie achvotnych prajści centralizavanaje testavańnie naličvajecca bolš za 175 tysiač čałaviek.
Jak paviedamiŭ dyrektar Respublikanskaha instytuta kantrolu viedaŭ Mikałaj Fiaśkoŭ, u apošni dzień rehistracyi na CT ažyjatažu ŭ punktach rehistracyi nie nazirałasia.
Usiaho ŭ hetym hodzie achvotnych prajści centralizavanaje testavańnie naličvajecca bolš za 175 tysiač čałaviek,a kolkaść vydadzienych propuskaŭ pieravysiła 481 tysiaču. Letaś, nahadajem, kolkaść udzielnikaŭ testavańnia była kala 176 tysiač.
Z ulikam pavieličeńnia kolkaści vypusknikoŭ ahulnaj siaredniaj škoły na 9 pracentaŭ u Ministerstvie adukacyi mierkavali, što i kolkaść udzielnikaŭ centralizavanaha testavańnia moža dasiahnuć u hetym hodzie 200 tysiač čałaviek, adnak, jak vidać, hetyja prahnozy nie spraŭdzilisia. Možna mierkavać, što nie ŭsie vypuskniki źviazvajuć svaju budučyniu z atrymańniem vyšejšaj adukacyi, bo ŭ procilehłym vypadku im daviałosia b u abaviazkovym paradku zdavać centralizavanyja ispyty. A mahčyma, što chtości vyrašyŭ adkłaści «šturm» VNU na bolš poźni čas i pierad hetym «uzbroicca» rabočaj prafiesijaj.
Samaj masavaj dyscyplinaj CT, jak i ŭ papiarednija hady, stała matematyka, kudy zarehistravałasia kala 116 tysiač čałaviek(letaś było bolš jak 110 tysiač). Druhoj pa masavaści dyscyplinaj stała ruskaja mova, kudy zarehistravałasia kala 110 tysiač abituryjentaŭ.
A voś biełaruskuju movu pažadali zdavać na centralizavanym testavańni tolki krychu bolš za 65 tysiač abituryjentaŭ. Choć jašče niekalki hadoŭ tamu i na biełaruskuju, i na ruskuju movu rehistravałasia prykładna adnolkavaja kolkaść maładych ludziej.A byli časy, kali biełaruskaja mova była navat bolš papularnaj u abituryjentaŭ na CT, čym ruskaja.
Na centralizavanaje testavańnie pa fizicy było vydadziena krychu bolš za 52 tysiačy propuskaŭ, na bijałohiju — 33 tysiačy, chimiju — kala 19,7 tysiačy. Na zamiežnyja movy zarehistravałasia pryblizna 40 tysiač čałaviek, na historyju Biełarusi — bolš jak 26 tysiač, hieahrafiju — 2,5 tysiačy, hramadaznaŭstva — 12,5 tysiačy, suśvietnuju historyju — 2,4 tysiačy.
Mikałaj Fiaśkoŭ padkreśliŭ, što dakładnaja kolkaść udzielnikaŭ testavańnia pa ŭsich pradmietach stanie viadomaj paśla pravierki ŭsich listoŭ rehistracyi i vyjaŭleńnia tak zvanych «dvajnikoŭ» — abituryjentaŭ, jakija zarehistravalisia bolš čym na try pradmiety. Na žal, takich chitrunoŭ kožny hod nabirajecca dzie‑try sotni.
Nahadajem, što centralizavanaje testavańnie startuje ŭ hetym hodzie na niekalki dzion paźniej, što źviazana z padaŭžeńniem u škołach navučalnaha hoda. I pieršymi 15 červienia ŭ punkty praviadzieńnia CT pryjduć abituryjenty, jakija pažadali zdavać na CT biełaruskuju movu.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ23
Kamientary