Ceły luty na vialikim ekranie buduć pakazvać filmy Łarsa fon Tryjera. Paśla pakazu ich možna abmierkavać z kinaekśpiertam
Skandalny dacki režysior, cynik, pravakatar, adzin sa stvaralnikaŭ kirunku kino «Dohma 95», kolišniaja piersona non hrata na Kanskim kinafiestyvali — Tryjer sa svajoj pładavitaj filmahrafijaj i chulihanskimi vychadkami źjaŭlajecca adnym z najviadomiejšych režysioraŭ nie tolki ŭ Danii, ale i ŭ śviecie. Pa piatnicach i subotach lutaha ŭ minskim kinateatry «Pijanier» buduć prachodzić «Uikendy z Łarsam fon Tryjeram», na jakich pakažuć vosiem karcin aŭtara i abmiarkujuć ich z kinaekśpiertam Iharam Sukmanavym.
Pieršy sieans adbudziecca ŭžo 5 lutaha. Padčas «Uikendaŭ» buduć pakazanyja filmy, što prynieśli režysioru słavu ŭ pačatku karjery, uładalniki prestyžnych uznaharod i stužki, premjery jakich šakavali publiku i vyklikali hramadski rezanans.
U padborcy niama znakamitych karcin 2010-ch kštałtu «Antychrysta» ci «Nimfamanki»: jana prapanuje prasačyć za mienš viadomaj sučasnamu hledaču častkaj filmahrafii Tryjera. Va «Uikendy» ŭklučany raboty «Elemient złačynstva» i «Epidemija», «Jeŭropa» i «Manderlej», a taksama hučnyja «Taja, što tancuje ŭ ciemry» i «Raśsiakajučy chvali».
Pakaz kožnaj z vaśmi karcin budzie praciahvacca abmierkavańniem ubačanaha z kinakrytykam, kinaekśpiertam i prahramnym dyrektaram kinafiestyvalu «Listapad» Iharam Sukmanavym.
Ułasna kampanija «Art Karparejšn», što źjaŭlajecca arhanizataram «Listapada» i nazyvaje siabie hidam pa dobrym kino, vystupaje arhanizataram i «Uikendaŭ z Łarsam fon Tryjeram». Apošni pakaz sieryi projdzie 27 lutaha.
Łars fon Tryjer: manipulatar
5 lutaha — «Epidemija»
6 lutaha — «Taja, što tancuje ŭ ciemry»
Łars fon Tryjer: čaraŭnik
12 lutaha — «Elemient złačynstva»
13 lutaha — «Jeŭropa»
Łars fon Tryjer: naśmiešnik
19 lutaha — «Samy hałoŭny bos»
20 lutaha — «Manderlej»
Łars fon Tryjer: dahmatyk i navatar
26 lutaha — «Idyjoty»
27 lutaha — «Raśsiakajučy chvali»
Kamientary