«Vyjšaŭ hreć mašynu, kab advieźci dzicia ŭ škołu, i nie viarnuŭsia». Zatrymany šachcior Juryj Korzun
Ranicaj 11 lutaha ŭ Salihorsku zatrymali siabra strajkama «Biełaruśkalija» Juryja Korzuna. Pra heta Tut.by raspaviała jaho žonka Kaciaryna. Ciapier jon znachodzicca ŭ IČU, pryčyna — č. 1 art. 23.34. Inšyja padrabiaznaści nieviadomyja.
Kaciaryna kaža, što Juryj źnik paśla taho, jak vyjšaŭ z domu ŭ 6:50 ranicy.
— Jon vyjšaŭ hreć mašynu, kab źjeździć jaje zapravić, viarnucca dadomu i advieźci dzicia ŭ škołu, ale nie viarnuŭsia. Kali ja vyjšła na parkoŭku, jaho mašyna stajała, jaho samoha nie było, a na parkoŭcy byli ślady lehkavoha aŭtamabila, jaki raźviarnuŭsia i źjechaŭ. Tamu ja vyrašyła, što albo jaho zatrymali, albo jon źjechaŭ na taksi, kab zapravić kanistru, kali ŭ jaho zusim nie było bienzinu. Pačakała, jak zvyčajna, try hadziny, pa zakančeńni troch hadzin źviarnułasia ŭ RAUS, — raspaviadaje Kaciaryna.
Tam skazali, što dla atrymańnia hetaj infarmacyi joj treba źviarnucca asabista z pašpartam. U svoj abiedzienny pierapynak Kaciaryna pajechała tudy.
— Mnie adkazali, što jon znachodzicca ŭ IČU pa pryčynie č. 1 art. 23.34. Padrabiaznaściaŭ nijakich nie viedaju. Maje čakańni — sud na praciahu troch dzion. Mienš za 15 sutak nikoli nie davali, — kaža Kaciaryna.
Pavodle jaje słoŭ, inšych zatrymańniaŭ udzielnikaŭ stački siońnia nie było, ale ŭ apošnija try dni niekatorych «abzvońvali i sprabavali ŭručyć pozvy, a ŭčora pryjazdžali pa miescy prapiski jašče adnaho čałavieka».
U vieraśni 2020 hoda Juryj Korzun prykavaŭ siabie da hornazdabyŭnoha abstalavańnia i admoviŭsia vychodzić na pavierchniu ŭ znak pratestu. Paśla hetaha jon dałučyŭsia da stački.
Kamientary