U Homieli vynieśli prysud 46-hadovamu Uładzimiru Hančarovu, jaki letam źbiŭ dvaich niepaŭnaletnich viełasipiedystaŭ — dziaŭčyna ad atrymanych traŭmaŭ pamierła na miescy. I heta nie pieršaje śmiarotnaje DTZ mužčyny: niekalki hadoŭ tamu pry takich ža abstavinach jon źbiŭ piaciarych dziaciej u Vietcy, piša Tut.by.
Hančarovu dali siem hadoŭ kałonii va ŭmovach ahulnaha režymu z prymusovym lačeńniem ad ałkahalizmu.
Akramia hetaha, paciarpiełym bakam — 17-hadovamu Arciomu i maci zahinułaj Kryściny — vypłaciać u jakaści kampiensacyi maralnaj škody 75 i 50 tysiač rubloŭ adpaviedna.
Ale płacić hetyja hrošy pavinna budzie žonka Hančarova: jana ŭ sudzie była hramadzianskim adkazčykam, bo źjaŭlajecca ŭładalnicaj mašyny, na jakoj abvinavačany ździejśniŭ śmiarotnaje DTZ.
Žančyna pazoŭ nie pryznała: paviedamiła sudu, što ŭ jaje takich hrošaj niama, pryniesła daviedki z pracy ab pamiery zarobku — jon nie pieravyšaje 300 rubloŭ.
Hančaroŭ prasiŭ sud nie patrabavać z žonki hrošaj. «Va ŭsim vinavaty tolki ja. Chaj usio viešajuć na mianie i ź mianie ŭsio vyličvajuć, budu vypłačvać da kanca svajho žyćcia».
Trahiedyja adbyłasia 18 lipienia minułaha hoda niedaloka ad aeraporta Homiel. Hančaroŭ na svaich «Žyhulach» źjechaŭ na pravuju abočynu i tam źbiŭ 16-hadovych viełasipiedystaŭ Kryścinu i Arcioma. Dziaŭčynu adkinuła na prajeznuju častku darohi, dzie na jaje najechaŭ inšy aŭtamabil — Alfa Romeo. Ad atrymanych traŭmaŭ jana pamierła na miescy. Chłopca z traŭmami dastavili ŭ balnicu. Paźniej ekśpiertyza ŭstanaviła: Hančaroŭ byŭ pjany, u jaho kryvi vyjavili bolš za dva pramile ałkaholu.
A potym akazałasia, što niekalki hadoŭ tamu Hančaroŭ užo adsiedzieŭ za anałahičnaje DTZ. U kastryčniku 2008 hoda jon, pjany i biez pravoŭ, prataraniŭ u Vietcy kampaniju dziaciej — tady zahinuli dva chłopčyki, 10 i 13 hadoŭ. Pry hetym kiroŭca navat nie spyniŭsia: pakinuŭ dziaciej pamirać na asfalcie, pryjechaŭ dadomu i loh spać.
Hančarova tady prysudzili da siami hadoŭ pazbaŭleńnia voli (heta było maksimalnaje pakarańnie).
Kamientary