Jak siamja ŭłaśnika «Domašnieho» akazałasia ŭ zakładnikach i pry čym tut jaho hihancki doŭh? 

My ŭžo apisvali historyju padzieńnia jaho biznesu. Niaŭdałaja stratehija i kryzis ŭdaryli pa abarotach sietki, u vyniku čaho piramidalnaja schiema apłaty pastaŭščykam abrynułasia. Dziasiatki kampanij akazalisia kinutymi. Kab zaciahnuć viartańnie daŭhoŭ, Bierazoŭski pačaŭ drabić kampanii, a sam u toj čas šukaŭ hrošy.

Kinutyja pajšli chto ŭ sud, chto ŭ orhany.

Čytajcie: Ułaśnik stratnaj sietki «Damašni» pasprabavaŭ pradać jaje, ale ciapier chavajecca ad kredytoraŭ. Raskazvajem pra łancuh pralikaŭ

Biełaruskija banki pierakredytoŭvać Bierazoŭskaha admovilisia, ale situacyja pahoršyłasia tym, što zatrymanymi akazalisia žonka i syn biznesmiena, u toj čas jak sam jon za miažoj. 

Imavierna, jany byli suzasnavalnikami ŭ jurydyčnych asobach, jakija paŭźnikali na miescach droblenych asnoŭnych kampanij. 

Jak viadoma «Našaj Nivie», prykładnaja suma doŭha Bierazoŭskaha pierad pastaŭščykami i inšymi kredytorami — kala 38 miljonaŭ. Krynicy taktoŭna nie nazyvajuć valutu. 

Ale z sapraŭdy cikavych aktyvaŭ abaznanyja nazyvajuć zamiežnuju nieruchomaść i handlovy centr «Sakret» u Homieli. Za ich Bierazoŭski sprabavaŭ atrymać usiu patrebnuju sumu ŭ adnaho ź biznes-partnioraŭ Paŭła Tapuzidzisa, ale atrymaŭ tolki prapanovu na mienšuju sumu, ad jakoj spačatku admoviŭsia.

Hetak ža prachodzili pieramovy ź inšymi patencyjnymi pakupnikami. U vyniku, kali Bierazoŭski zajšoŭ na druhoje pieramoŭnaje koła, suma zhody źniziłasia jašče na dziesiać miljonaŭ.

«Jaho pamyłka ŭ tym, što nie pradaŭ za pieršuju canu. Rynak pradaŭcoŭ i pakupnikoŭ takoha vialikaha tavaru ŭ nas maleńki, i Bierazoŭski viedaje ŭsich, u kaho jość realnyja dziasiatki miljonaŭ dalaraŭ. A jany, adpaviedna, viedajuć jaho i jaho situacyju. Aleharyčna možna skazać, što kali čałavieku treba pradać «Reno» za 10 tysiač dalaraŭ, to jon, kali pačakaje, pradaść. Kali ž jamu treba pradać terminova, to skinie try tysiačy i pradaść u toj ža dzień, bo pakupnikoŭ chapaje. Ale Bierazoŭskamu treba pradać «Majbach» za miljon dalaraŭ, jaki siońnia, ułasna kažučy, i za 500 tysiač mała chto voźmie», — apisvajuć pryhody Bierazoŭskaha abaznanyja krynicy. 

Ciapier Bierazoŭski ŭ ciažkaj situacyi, ale praciahvaje vieści pieramovy z bujnymi hulcami biełaruskaha rynku, asabliva z tymi, chto zacikaŭleny ŭ pašyreńni svaich sietak rytejła. 

Nakolki viadoma «Našaj Nivie», jon nie vieryć u mahčymyja prapanovy śledstva adpuścić śviedkaŭ pa spravie, kali źjavicca ŭ Biełarusi sam. Ale ŭ toj ža čas pakutuje ad uśviedamleńnia, što siamja ŭ zakładnikach. Prynamsi ab tym, što takija prapanovy isnujuć, jon kaža nabližanym.

• 0
• 0
• 0
• 0
• 0
• 0
• 0
• 0