«Kažuć, kali jon pjany — zusim durny». Što viadoma pra trahiedyju ŭ Viciebsku, dzie muž paraniŭ žonku i zabiŭ miesiačnuju dačku

Paciarpiełaj Volzie S. — 31 hod. Jana pracavała na miasakambinacie, «niedzie na fasoŭcy ŭ ladoŭni», jak kažuć jaje znajomyja. Da hetaha Volha kala 10 hadoŭ žyła ŭ tak zvanym «hramadzianskim šlubie». Para nie raśpivałasia, ale mieła 9-hadovu dačku. Ale hod tamu ŭviesnu paznajomiłasia sa svaim kaleham ź miasakambinata: 32-hadovym Siarhiejem Aviečkinym. Zakruciŭsia raman. Volha pryniała rašeńnie razyjścisia z baćkam svajoj dački — i syjšła da Siarhieja. Užo ŭ žniŭni, jany pabralisia šlubam. 

«Volha — čałaviek absalutna adekvatny. Achajnaja, dobraja haspadynia. Nijakich prablem z ałkaholem ci čymści jašče ŭ jaje nikoli nie było i zaraz niama, — raskazvaje «Našaj Nivie» maci byłoha sužyciela žančyny. — Choć jana i razyjšłasia z maim synam, u nas ź joju zastavalisia narmalnyja adnosiny, u majho syna taksama». 

Spačatku Volha i jaje novy muž žyli ŭ jaje baćkoŭ. Ale kažuć, tam byli skandały, u vyniku ciešča ź cieściem nie vytryvali i vyhnali Siarhieja. Syjšła za im i Volha. Spačatku para zdymała kvateru, ale ŭ studzieni pamierła babula Volhi, ad jaje zastałasia kvatera. Tudy jany i pierajechali, razam z dačkoj. 

U hetaj kvatery praź niekalki miesiacaŭ i adbudziecca biada.

«Ja dobra nie viedaju taho Aviečkina, nie mahu pra jaho ničoha skazać. Ale čuła, što jon vypivaŭ. Ahulnaja znajomaja pra jaho skazała tak: «Jon kali pjany — zusim durny». Voś i ŭsio, što ja viedaju.

Apošnim časam jon nie pracavaŭ. U Volhi była narmalnaja zarpłata na miasakambinacie, a kali jana zaciažaryła i ŭžo pajšła ŭ dekret, joj dapamahali baćki», — kaža znajomaja Volhi.

Miesiac tamu Volha naradziła małodšuju dačku. Nazvali jaje Darynaj. A 27 lipienia zdaryłasia trahiedyja. 

«Pavodle śledstva, uviečary 26 lipienia ŭ Viciebsku pamiž 32-hadovym mužčynam i jaho 31-hadovaj žonkaj adbyŭsia kanflikt. Mužčyna ŭziaŭ kuchonny nož, nanios im udary žoncy i dačce, a sam źbieh ź miesca zdareńnia. Žančyna paśpieła vyklikać chutkuju miedycynskuju dapamohu i razam ź dziciom była špitalizavanaja. Dzicia vyratavać nie ŭdałosia. Ad atrymanych traŭmaŭ niemaŭla pamierła», — paviedamlaje Śledčy kamitet. 

Pavialičyć

U dzień trahiedyi starejšaj dački vypadkova nie akazałasia doma. Adna babula zaviezła dzicia da inšaj.

Zaraz Volha znachodzicca ŭ reanimacyi. Kažuć, prahnozy pazityŭnyja, žančyna vyžyvie.

Na jaje muža zaviali kryminalnuju spravu za zamach na zabojstva žonki i zabojstva niemaŭla. Jamu pahražaje ad 8 da 25 hadoŭ źniavoleńnia, abo pažyćciovy termin, abo śmiarotnaje pakarańnie.

• 0
• 0
• 0
• 0
• 0
• 0
• 0
• 0