81‑hadovuju piensijanierku z Mahilova aštrafavali za «abrazu Łukašenki»
Ała Niaŭmojeva paspračałasia z kamunalnikami, kali vykidała śmiećcie. Tyja zapisali jaje pramovu na videa i vykłali ŭ TikTok. Sud pryznaŭ paciarpiełym Alaksandra Łukašenku. Pasiadžeńnie ŭ sudzie Kastryčnickaha rajona Mahilova adbyłosia 11 žniŭnia, paviedamlaje «Radyjo Svaboda».
Ału Niaŭmojevu viedajuć staražyły mahiloŭskaha demakratyčnaha ruchu, čyja aktyŭnaja dziejnaść prypadała na 1990-ja. Ciapier joj 81 hod, u jaje invalidnaść 2‑j hrupy. A historyja, jakaja skončyłasia sudom, zdaryłasia jašče ŭ krasaviku.
Z materyjałaŭ spravy: «Niaŭmojeva Ała Fiodaraŭna, majučy namier na ździajśnieńnie złačynstva suprać paradku kiravańnia (č. 1 art. 368 KK), u prysutnaści inšych asobaŭ publična i naŭmysna vykazała ŭ vusnaj formie nienarmatyŭnyja vyrazy, jakija abrazili honar i hodnaść prezidenta Biełarusi ŭ suviazi z ažyćciaŭleńniem im svaim paŭnamoctvaŭ».
Jak zajaviła žančyna na pieršym pasiadžeńni 4 žniŭnia, usio pačałosia z taho, što jana pajšła vykinuć śmiećcie da kantejnieraŭ. Tudy ž padjechali supracoŭniki «Śpiecaŭtapradpryjemstva». Śmiaciar pačaŭ zadavać pytańni i zdymać na kamieru. Pa sutnaści, pravakavaŭ, adznačyła jana ŭ sudzie.
Ała Niaŭmojeva pryznała, što sapraŭdy vykarystała niecenzurnuju leksiku ŭ adras Łukašenki. Ale ŭdakładniła, što jaje prosta daviali.
«Usio havaryła narmalna spačatku, a ŭ kancy niervy nie vytrymali, što ja bjusia, a nikomu ničoha nie patrebna. Maciuki vykarystała, tak. Ale zaŭvah mnie nichto nie rabiŭ. Nie spraviłasia z emocyjami», — paskardziłasia pensijanierka.
Tym nie mienš aficyjna paciarpiełym u kryminalnaj spravie ab abrazie na śmietniku pablizu Viciebskaha praśpiekta, 28 pryznali Łukašenku.
Sudździa Žanna Puškina prysudziła minimalna mahčymaje pakarańnie — 30 bazavych (870 rubloŭ).
Za apošni čas heta pieršy vypadak, kali kryminalnaja sprava za abrazu pieršaj asoby dziaržavy skončyłasia materyjalnym spahnańniem, a nie abmiežavańniem ci pazbaŭleńniem voli.
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary